Pinagbibitiw na sa puwesto ng ilang career officers ng Department of Foreign Affairs o DFA si Secretary Alan Peter Cayetano.
Kasunod ito ng kapabayaan di umano ni Cayetano at iba pang appointees nito para maresolba ang diplomatic standoff ng bansa at Kuwait.
Sa pamamagitan ng isang liham na ipinadala ng Union of Foreign Service Officers kay Pangulong Rodrigo Duterte, binigyang diin ng grupo na ang kawalan ng karanasan at pagpapabaya ni Cayetano kaya’t nalalagay sa alanganin ang relasyon ng dalawang bansa dagdag pa ang kalagayan ng libu-libong mga manggagawang Pilipino sa Kuwait.
Tinawag ding hindi kuwalipikado ng grupo si DFA Undersecretary for Migrant Workers Affiars Sarah Lou Arrilo na isang non-career official at walang karanasan sa paghawak sa mga isyu sa mga OFW.
Dahil umano sa kakulangan sa kaalaman ng dalawa sa mga umiiral na international laws at foreign policies ay napauwi sa bansa si Ambassador to Kuwait Renato Villa na idineklara ring persona non grata.
—-