Isinusulong ng dalawang senador ang isang resolusyon na naglalayong mabigyan ng pagkilala si Pasig City Mayor Vico Sotto.
Ito ay matapos mapabilang si Sotto sa isa sa 12 tinanghal na international anti-corruption champions ng u-s state department.
Batay sa Senate Resolution Number 660 nina Senate President Vicente Sotto III at Senador Panfilo Lacson, kanilang hinihimok ang senado na bigyang parangal at pagbati ang alkalde para sa nakamit nito.
Anila, makatutulong ang iginawad na pagkilala kay Sotto para mapataas ang moral at dangal ng mga Filipino sa gitna na rin ng mapanghamong panahon ng pandemiya.
Kasabay nito, pinuri ng dalawang senador ang transformational brand o makabagong tatak ng pamumuno ni Sotto dahilan kaya nagsisilbi na ring modelo ang lungsod ng pasig sa iba pang LGU’s.
