Pinasinayaan nina Senador Lito Lapid at Sarangani Governor Ruel Pacquiao ang multi-million tourism infrastructure project sa Ladol Beach Resort sa bayan ng Alabel, Sarangani.
Ayon kay Sen. Lapid na Chairman ng Senate Committee on Tourism, malaki ang maitutulong ng proyekto sa Alabel upang magkaroon ng hanapbuhay ang mga residente at mahikayat pa ang mga lokal at dayuhang turista na bisitahin ang munisipalidad.
Katuwang ng senador ang kanyang anak na si Mark Lapid, Chief Operating Officer ng Tourism Infrastructure and Enterprise Zone Authority, bilang proponent ng naturang infrastructure project na nagkakahalaga ng P106 million.
Kaugnay nito, nangako ang tinaguriang supremo na patuloy ang pagkakaloob ng tulong at proyekto sa Alabel upang mas umunlad ang munisipalidad.
Samantala, inanunsyo naman ni Mayor Vic Paul Salarda na mayroong free entrance sa Ladol Beach ang mga taga-Alabel. Kaakibat nito, mabibigyan ng pwesto sa tourist hub ang mga residente para sa kanilang hanapbuhay.
