Handa na ang Land Transportation Office (LTO) sa inaasahang pagdagsa ng mga uuwi sa kaniya-kaniyang lalawigan sa nalalapit paggunita ng Undas ngayong taon.
Ayon kay LTO Chief Edgar Galvante, kanilang nailatag na ang mga preparasyon para mapanatiling ligtas ang mga lansangan sa Undas.
Kabilang na rito aniya ang pagsasagawa ng inspeksyon ng LTO Law Enforcement Units sa mga terminal ng bus upang tiyaking na hindi ito magkakaaberya sa gitna ng mahabang byahe at hindi maabala ang mga mananakay.
Handa na rin umano ang lahat ng sangay ng LTO nationwide para sa paglulunsad ng programang Oplan Biyaheng Ayos: Undas sa buong bansa.
Sinabi ni Galvante na minabuti na nilang maghanda ng maaga para matiyak na plantsado na ang lahat bago pa dumating ang araw ng All Souls Day at All Saints Day sa November 1 at 2.
