Tatlong lalaki, kabilang ang isang opisyal ng partylist group na lumalaban sa iligal na droga at menor de edad na ginawa umanong courier ang nasakote sa buy-bust operation sa Dasmariñas City, Cavite.
Kinilala ang isa sa mga suspek at mastermind na si Jerklie Abdulkarim, Regional Officer ng tumatakbong party-list group na People’s Volunteers Against Illegal Drugs.
Narekober ng National Bureau of Investigation kina Abdulkarim ang nasa kalahating kilo ng high grade shabu na nagkakahalaga ng P1M.
Naganap ang buy-bust operation sa isang talipapa kung saan pinaligiran ng mga otoridad ang kotse ng mga suspek.
Ayon sa N.B.I., ilang taon nang nagbebenta ng droga ang mga suspek sa Cavite at Metro Manila.
Samantala, nilinaw ni Abdulkarim na walang kinalaman ang grupo sa krimen habang kinondena na ng kanilang partylist ang pagkakadawit ng isa sa kanilang opisyal.
