Nasa tatlong milyong halaga ng shabu ang nasabat ng mga otoridad matapos maaresto ang isang lalaki sa Maynila.
Sa imbestigasyon, nahuli ang suspek na kinilalang si Musa Nasrudin Baguilan, matapos magsagawa ng operasyon ang mga tauhan ng Philippine Drug Enforcement Agency o PDEA, sa harapan ng Bureau of Immigration o BI, sa bahagi ng Magallanes Drive, Intramuros, Manila.
Ayon kay PDEA Director General Wilkins Villanueva, nakuha mula sa suspek ang kalahating kilo ng shabu at buy-bust money.
Sa ngayon ay nakakulong na ang suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.—sa panulat ni Angelica Doctolero
