Nagsagawa ng mass testing para sa coronavirus disease 2019 ang pamahalaan ng Cebu City kaya’t tumaas ang kaso ng COVID-19 dito.
Ito ang paliwanag ni Cebu City Mayor Edgardo Labella matapos na muling isailalim ang Cebu City sa enhanced community quarantine (ECQ) ni Pangulong Rodrigo Duterte Lunes ng gabi.
Matatandaang tanging ang Cebu City lang ang lugar na muling ibinalik sa ECQ matapos itong isailalim sa general community quarantine (GCQ) mula June 1 hanggang June 15.
Dahil dito, planong umapela ni Labella para muling maibalik ang lungsod sa GCQ.
Aniya, sa 3,434 na naitalang kaso ng COVID-19 sa lungsod, mahigit kalahati na naturang bilang ang gumaling.
Ibig sabihin ay mas mataas pa aniya ang kanilang recovery rate kumpara sa pangkabuuang recovery rate ng bansa.
Handa naman aniya sila na tumugon sa naging desisyon ng Inter-Agency Task Force (IATF) at ni Pangulong Duterte ngunit umaasa ito na mapagbigyan ang kanyang kahilingan.
