Dismayado si Anakpawis Partylist Representative Fernando Hicap, dahil sa kabila ng sigalot sa China dahil sa pinag-aagawang teritoryo sa West Philippine Sea ay sa Dalian Locomotive and Rolling Stock ng China pa ibinigay ang kontrata para sa mga bagong Metro Rail Transit (MRT) train.
Ayon kay Hicap, kataksilan umano ang pag-award ng Department of Transportation and Communication (DOTC) ng kontrata sa isang korporasyon sa China para sa mga bagong bagon ng MRT.
Ang nasabing kumpanya ay subsidiary ng CHR Group na isang state-owned corporation sa China.
Hindi umano siniseryoso ng administrasyong Aquino ang paglapastangan ng China sa Pilipinas.
Ang nakakalungkot din umano ay ang mahigit P3.75 bilyon pondo mula sa buwis ng taumbayan ay mapupunta lang sa China.
By Mariboy Ysibido
