Milyon-milyon umano ang pinag-uusapan sa loob ng Bureau of Corrections para masakop ang isang preso ng Good Conduct Time Allowance Law (GCTA) at mapaaga ang paglaya.
Ito ang ibinunyag ni Senate President Vicente Sotto III sa kaniya umanong natanggap na “a1″ intelligence report hinggil sa kurapsyon sa BuCor.
Ayon kay Sotto, milyones daw ang bayaran sa BuCor at naibahagi na rin umano niya ang impormasyon kay Sen. Panfilo Lacson.
Hindi naman pinangalanan ni Sotto kung sinong opisyal o tauhan ng BuCor ang sangkot sa bayaran.
Tumanggi rin ang Senate President na sabihin kung sino o saan nito nakuha ang naturang impormasyon.
Sinabi ni Sotto na magandang abangan na lamang ang kalalabasan ng pagdinig ngayong araw hinggil sa nasabing kontrobersya.
