Nadagdagan pa ng 47 mga miyembro ng New People’s Army (NPA) ang sumuko sa pamahalaan.
Nabatid na sumuko sa 2nd Infantry Battalion ng Philippine Army ang mga NPA sa Milagros, Masbate na kinabibilangan ng umano’y pitong miyembro ng NPA, apat na miyembro ng Milisyang Bayan, at 36 na tagasuporta ng mga ito.
Kasabay ng kanilang pagsuko ay ang pagsurrender nila ng 57 bilang ng iba’t ibang klase ng mga baril kasama ng isang anti-tank at isang anti-personnel mine, mga bala at magazine ng mga baril.
Sa pahayag ni Col. Aldwine Almase, Brigadier Commander ng Philippine Army 903rd Brigade, makakatanggap ng assistance ang mga sumukong NPA para sa kanilang pagbabagong buhay.
Samantala, nangako naman ang Philippine Army na patuloy nilang hihikayatin ang mga NPA na sumuko at magbalik-loob sa pamahalaan.
Sa ngayon, umabot nasa halos 1,200 miyembro ng umano’y tagasuporta ng NPA ang sumuko na sa Bicol Region ngayong taon. —sa panulat ni Angelica Doctolero
