Walumpu’t walong (88) Pilipino na mula sa iba’t ibang bansa ang nagpositibo sa 2019 coronavirus disease (COVID-19).
Walumpu (80) rito, ayon kay Health assistant secretary Maria Rosario Vergeire, ay mula sa MV Diamond Princess.
Sa 80 Pinoy crew na cruise ship na na-admit sa ospital sa Japan, 42 na ang nakalabas na ng pagamutan at 21 sa kanila ay nakauwi na ng Pilipinas.
Mayroon namang 13 pa ang naka-book na at walo pa ang naghihintay ng kanilang flight para makabalik ng Pilipinas samantalang 38 pang Pinoy patients ay nasa ospital pa sa Japan at nagpapagaling pa.
Sa Hong Kong naman, tatlong Pinoy ang nagpositibo sa sakit at dalawa sa kanila ay nakarekober na subalit sasailalim pa sa mga panibagong pagsusuri bago palabasin ng ospital.
Tatlo ring Pinoy ang nagpositibo sa 2019 coronavirus disease (COVID-19) sa Singapore at isa rito ay nadischarge na.
Nasa dalawang Pinoy naman ang nagpositibo sa COVID-19sa United Arab Emirates.
