Ilalagay sa code white alert ang lahat ng medical staff sa mga ospital sa Region 7 simula sa Marso 28 hanggang Abril 25, taong kasalukuyan.
Ito’y nangangahulugan na naka-alerto sa anumang emergency ang mga doctor at nurse na bahagi ng paghahanda ng Department of Health o DOH sa ASEAN Summit Meetings mula Abril 3 hanggang 7 sa Cebu at mula Abril 18 hanggang 22 sa Bohol.
Ayon kay Dr. Expedito Medalla, head ng Task Force Medical ng DOH sa Region 7, 31 medical personnel ang itatalaga sa iba’t ibang venue at mga hotel kung saan magpupulong ang mga minister, senior officials at technical working group.
May itatalaga ring mga toxicologist ang National Office ng DOH sa Cebu at Bohol upang matiyak na ligtas ang mga pagkain ng mga delegado.
By Jelbert Perdez
