Kakanselahin ng Land Transportation Franchising and Regulatory Board (LTFRB) ang lisensya ng mga jeepeny driver na nakikiisa sa tigil-pasada ng grupong Pinagkaisang Samahan ng mga Tsuper at Operator Nationwide o PISTON.
Ipinabatid ito ni LTFRB Board Member Atty. Aileen Lizada na nagsabing nagkansela na sila ng drivers license at prangkisa ng mga operator na sumama sa mga nakalipas na protesta.
Ipinaalala ni Lizada na nahaharap pa rin sa mga reklamo at kaso si PISTON President George San Mateo na nagsabing ang tigil-pasada ay bilang pagkontra pa rin sa PUV modernization program ng gobyerno.
Hindi naman titigil ang grupong PISTON sa pagkontra sa PUV modernization program.
Kasunod na rin ito nang isinasagawang tigil-pasada ng grupo ngayong araw na ito dahilan kaya’t kinansela ang klase sa ilang paaralan.
Sinabi sa DWIZ ni PISTON President George San Mateo na sadyang napakaraming problema ng naturang programa lalo na ang umano’y pagiging sahuran ng mga driver.
“Maraming problema mula sa financing hanggang sa pag-manufacture tapos ‘yun pang sinasabi na mas gaganda ang lagay ng mga driver dahil magiging sahurang empleyado na, eh ang problema natin paano ma-enjoy ng mga driver ‘yung benefits ng pagiging sahuran eh ito ngang si President Duterte ay hindi tinupad ang pangako sa mga manggagawa na aalisin ang contractualization, ang mga driver contractual na mangagagwa ng mga fleet management, walang job security at mababa ang pasahod lalo na sa mga probinsya.” Ani San Mateo
Sentro ng mga protesta sa Metro Manila ang Cubao at Novaliches sa Quezon City, Anda Circle sa Maynila, Monumento sa Caloocan at Alabang sa Muntinlupa at ramdam din sa mga lalawigan ng Cavite, Laguna, Batangas at Rizal.
(Balitang Todong Lakas Interview)