Nagbabala ang Catholic Bishops’ Conference of the Philippines laban sa posibleng “political exploitation” sa mga alegasyon ni dating Ako Bicol Party-list Rep. Zaldy Co.
Kasabay nito, umapela ang CBCP para sa due process, lalo sa sensitibong panahon ngayon na maaaring magpasiklab sa sentimyento ng publiko na posibleng gamitin naman ng ilang pulitiko.
Binalaan din ni CBCP President Pablo Virgilio Cardinal David ang publiko kaugnay sa developments sa flood control scandal na maaaring samantalahin ng ilang nagnanais na mag-udyok ng political outcome.
Karapatan anya ng mga Pilipino na maliwanagan at hindi manghula; mabatid ang katotohanan sa halip na tsismis at pananagutan sa halip na manipulasyon.
Umapela rin si Cardinal David sa lahat ng partido, sangkot man o hindi sa nasabing anomalya, na kumilos nang may katapatan, katapangan, at responsibilidad.
Sa halip anya na maniwala agad, dapat munang beripikahin ang lahat ng mga sinabi ng dating mambabatas at umuwi ng bansa upang patunayan ang kanyang mga paratang.
