Nais ni Senate Committee on Basic Education chairman Senador Bam Aquino na patawan ng mas mabigat na parusa ang mga indibidwal at paaralan na umaabuso sa pondo ng pamahalaan sa ilalim ng private school voucher program.
Ginawa ni Sen. Aquino ang panawagan matapos ibunyag ng isang Private Education Assistance Committee o PEAC official na may ilang pribadong paaralan na may provisional permit na gumagamit ng ghost students para makinabang sa senior high school voucher program.
Sa pagdinig ng Committee on Basic Education kaugnay ng mga panukalang gawing mas moderno at palakasin ang suporta ng pamahalaan sa pribadong basic education, sinabi ni Sen. Aquino na dapat isama sa committee report ang hiwalay at mas mataas na parusa upang hadlangan ang pandaraya.
Binigyang-diin ni Aquino na irerekomenda sa committee report ang mas mabigat na parusa upang maiwasan ang maling paggamit ng pondong inilaan para sa edukasyon ng mga estudyante.
Umaasa si Aquino na makuha ang suporta ng mga kapwa mambabatas, sa pagsasabing kailangan ng mas mabigat na parusa upang magdalawang-isip ang mga nagbabalak abusuhin ang sistema.
