Umapela si Marawi City Mayor Majul Gandamra kay Iligan City Mayor Celso Regencia na bigyan pa siya ng panahon para makapaghanap ng malilipatan para sa mga bakwit o evacuees ng Marawi siege.
Ito’y makaraang maglabas na ng pahayag si Mayor Regencia na paaalisin na niya ang mga bakwit na nananatili pa rin sa iba’t ibang evacuation centers sa kanilang lungsod.
Ayon kay Mayor Gandamra, nagkukumahog na sila ngayon kung saan sila makakahanap ng panibagong lugar para sa libu-libong kababayan niya na nasa Iligan.
Magugunitang nasa mahigit 1,600 pamilya ng mga Maranao ang nananatili pa rin sa iba’t ibang mga evacuation centers na hindi nabiyayaan ng temporary shelters sa lungsod.
