Naniniwala ang Malakanyang na walang dapat ikabahala sa kalusugan ni dating Pangulong Rodrigo Duterte, sa kabila ng ulat mula sa kanyang pamilya na labis itong namayat habang nasa The Hague.
Ayon kay Palace Press Officer Claire Castro, base sa pahayag ng dating asawa ni Duterte na si Elizabeth Zimmerman, bagama’t pumayat ito ay mukhang nasa maayos naman itong kalagayan.
Lalo’t mismong ang dating Pangulo pa raw ang nagsabi na “okay” siya at hindi na rin daw siya umiinom ng maintenance medicine.
Ganito rin daw ang sinabi ni Vice President Sara Duterte na maayos ang lagay ng kanyang ama.
Tiniyak ng Palasyo na nabibigyan ng sapat na atensiyong medikal ang dating Pangulo habang nasa The Hague at hindi siya pababayaan habang humaharap sa kanyang kaso sa International Criminal Court.
