Pumalo na sa mahigit P1-B ang halaga ng pinsalang idinulot ng pananalasa ng bagyong Ulysses sa bansa.
Batay sa datos ng National Disaster Risk Reduction and Management Council (NDRRMC), nasa P1.19-B ang kanilang naitalang pinsala sa sektor ng agrikultura.
Ayon kay NDRRMC Spokesman Mark Timbal, nagmula ito sa mga rehiyon ng Ilocos, Cagayan Valley, Central Luzon, Calabarzon Bicol Region at Metro Manila.
Habang nasa P469-M naman ang naitalang pinsala sa imprastraktura na mas mababa kumpara sa pagtaya ng Department of Public Works and Highways (DPWH) na nasa mahigit P4-B.
Ayon kay Timbal, naitala ang mga napinsalang imprastraktura sa Ilocos Region, Mimaropa at Bicol Region.
Paliwanag nito, nakabatay ang kanilang datos mula sa mga natatanggap nilang ulat mula sa regional disaster risk reduction and management offices sa mga lugar na lubhang sinalanta ng bagyo.