Sugatan ang isang ina at ang kanyang anak matapos silang barilin kaugnay ng alitan sa lupa sa Bacacay, Albay.
Nakuhanan pa ang suspek na si Juan Barcia (Barsya) habang nakatutok ang baril sa mga biktima bago nagpaputok.
Tinamaan sa hita si Anjie Bas, habang nagtamo rin ng tama sa hita ang kanyang anak na si Nelia.
Agad silang dinala ng mga residente sa ospital para lapatan ng lunas.
Sa isinagawang hot pursuit, natunton ang suspek ng mga pulis at nakumpiska ang baril na pinaniniwalaang ginamit sa pamamaril.
Nakakulong na si Barcia at haharap sa two counts ng frustrated murder.
Ayon sa imbestigasyon, matagal nang alitan sa lupa ang posibleng motibo.
