Pinalawig pa ng San Miguel Corporation ang pagbibigay ng libreng toll para sa lahat ng medical frontliners na dumaraan sa ilang expressway sa Luzon.
Ito’y ayon kay San Miguel Corporation President Ramon Ang ay hangga’t umiiral pa rin aniya ang enhanced community quarantine (ECQ) hanggang Mayo 15.
Dahil dito, libre pa ring makararaan ang mga medical frontliners sa ilang pangunahing expressway na pinatatakbo ng SMC tulad ng South Luzon Expressway (SLEX), Star Tollways, NAIA Expressway (NAIAX), Skyway at ang Tarlac, Pangasinan Expressway (TPLEX).
Maliban dito, nananatili ring bukas ang mga electronic card lane sa mga nabanggit na expressways upang mabilis na makaraan ang mga tinaguriang bagong bayani sa harap ng COVID-19 pandemic.
Gayunman, ipinaalala ng SMC na libre lamang ang toll sa mga medical frontliners kung iisang sasakyan lamang ang ginagamit nito.