Bukod sa Pasko, kaarawan ang pinakahihintay na selebrasyon ng isang tao dahil ito ang tanging araw na para lamang sa’yo at ikaw ang bida. Pero kakaiba rin ang trip ng lalaking nasa kwentong ito, dahil kinareer niya lang naman ang kaniyang birthday at ginawang more than once.
Kung paano ito nangyari? Eto.
Isang Japanese man na si Takashi Miyagawa na noo’y 39-anyos ang inaresto ng mga pulis sa Osaka dahil sa kaniyang ginawang panloloko sa 35 babae.
Ayon sa mga otoridad, lumapit sa kanila ang grupo ng kababaihang mga biktima umano ni Takashi kung saan pinagsabay-sabay daw sila at iba’t ibang birthdate rin ang sinasabi sa kanila para umano makakuha ng regalo.
Ibinahagi ng isang biktima na ang kaarawan daw ni Takashi ay February 22, ngunit isa pang biktima naman ang nagsabi na July ang kaarawan ng lalaki, at isa pang biktima ang nagsabing April daw ang sinabi sa kaniya, pero ang totoo, November 13 ang kaarawan ni Takashi.
Batay sa salaysay ng mga biktima, laging sinasabi ni Takashi na siya ay handang pumasok sa isang seryosong relasyon at dahil dito, nahuhulog ang kanilang loob.
Umabot sa 100,000 yen ang kabuuang halaga ng regalo na natanggap ni Takashi mula sa mga babae o nagkakahalagang mahigit 30,000 pesos.
Dahil dito, inaresto ng mga otoridad si Takashi dahil sa kasong panloloko o fraud.
Marami ang nagsabi na paano raw nagawa ni Takashi na mag-schedule ng date para sa iba’t ibang babae araw-araw sa loob ng isang linggo, kung saan kinaiinggitan nila ang time management skills na mayroon si Takashi.
Ikaw, kakayanin mo rin bang pagsabay-sabayin ang maraming karelasyon para lang makuha ang gusto mong regalo?
