Kumbinsido si Bayan Muna chairman at human rights lawyer Neri Colmenares na “trial ready” na ang kasong crimes against humanity laban kay dating Pangulong Rodrigo Duterte sa International Criminal Court.
Ipinunto ni Atty. Colmenares, na abogado rin ng mga sinasabing biktima ng madugong war on drug campaign ng nakaraang administrasyon, na malakas, “methodical” at “coherent” ang pagkakalahad ng mga ebidensya ng prosekusyon.
Habang mahina naman anya ang tugon ng depensa, na hindi direktang sumagot sa mga ibinabatong alegasyon laban kay Duterte.
Sakaling makarating sa mismong trial ang kaso, mas lalo pa anyang mahihirapan ang depensa ng dating pangulo na maglabas ng ebidensya para patunayang inosente ito sa drug war ng kanyang administrasyon.
