Hihintayin muna ng liderato ng Kamara ang magiging pasya ng Korte Suprema hinggil sa inihaing petisyon ng Makabayan Bloc na kumukuwestyon sa legalidad ng Tax Reform for Acceleration and Inclusion o TRAIN Law.
Ayon kay House Majority Floorleader at Ilocos Norte Representative Rodolfo Fariñas, mananahimik muna sila sa usapin upang hindi mapangunahan ang magiging pasya ng High Tribunal hinggil dito.
Magugunitang hiniling ng Makabayan Bloc sa Korte Suprema kahapon na pagpaliwanagin sina Pangulong Rodrigo Duterte, Executive Secretary Salvador Medialdea, Senate President Aquilino ‘Koko’ Pimentel III at House Speaker Pantaleon Alvarez sa paglagda sa nasabing batas gayung batid na iligal ang pagkakapasa rito ng Kongreso.
Una nang iginiit ng grupo na anti-poor at iligal ang pagpasa sa naturang batas dahil niratipikahan o pinagtibay ito ng Kongreso nang walang sapat na quorum o bilang ng mga mambabatas.
Tinawanan naman ito ni Solicitor General Jose Calida na nagsabing pinapadali lamang ng mga mambabatas ang kanyang trabaho para idepensa ang pagpasa sa nasabing batas.
Pero nanindigan si Presidential Spokesman Harry Roque na dumaan sa masusi at tamang proseso ang batas batay na rin sa pag-aaral na ginawa rito ng mga mambabatas.
Sa panayam naman ng DWIZ kay Budget Secretary Ben Diokno, tiniyak nito na pakikinabangan ng publiko ang TRAIN hindi lamang sa mga pangkaraniwang Pilipino kung hindi lalo na sa mga mahihirap.
—-