Tila sunud-sunod ang natatanggap na blessings ng aktres na si Jodi Sta. Maria na kamakailan lang ay na-nominate sa prestihiyosong International Emmy Awards.
Ngayon kasi ay in the works na ang new movie ni Sta. Maria mula sa Star Cinema na ‘Dear Other Self’ kung saan makakatambal niya sa unang pagkakataon sina JC de Vera at Joseph Marco bilang kanyang mga leading men.
Sa isang interview ibinulalas ng aktres na nakatutuwang makatambal ang mga mas batang aktor.
“Nakakatawa, ang lakas makabata. Baka mamaya 12 years old na or sila Nash Aguas na ang ka-partner ko. Nakakatuwa, ‘di ba? I get to work with these great talents,” Pahayag ni Sta. Maria.
Kasabay nito, tiwala naman si Jodi na papatok ang kanilang proyekto.
“Sabihin na lang natin na bawat proyekto na dumarating sa akin, talagang ‘yung buong puso ko nilalagay ko doon and ‘yung time and effort. I think important factor siya kaya nagwo-work din ‘yung mga tandem and ‘yung mga proyekto mismo.”
Sa pelikula gagampanan ni Jodi ang karakter ng isang babaeng mahihirapan sa pagpili kung ano ang mas mahalaga sa buhay excitement at adventure nga ba o security at stability.
Ngunit binigyang diin ni Jodi na sa tunay na buhay ay mahalaga na may balanse sa lahat ng bagay.
Sa ngayon ay inaabangan pa ang ibang detalye sa kanilang upcoming movie.
Matatandaang naging hit din ang pelikula ni Jodi na ‘The Achy Breaky Hearts’ kung saan nakatambal niya sina Richard Yap at Ian Veneracion.