Nagsanib-puwersa ang ilang abogado sa bansa upang mapigilan ang EJK o extrajudicial killings na di umano’y konektado sa giyera kontra illegal drugs ng Duterte administration.
Hiniling ng grupo sa Korte Suprema na atasan si PNP o Philippine National Police Chief Director General Ronald dela Rosa, Justice Secretary Vitaliano Aguirre at ang Commission on Human Rights o CHR na imbestigahan ang lahat ng kaso ng EJK o arbitrary detention, konektado man o hindi sa war on drugs ng administrasyon.
Nais rin ng grupo na atasan ang CHR, PNP at ang DOJ na bumuo ng epektibong mga hakbang upang maiwasan ang mga paglabag sa karapatang pantao habang umiiral pa ang giyera kontra droga.
Dapat rin anilang atasan ng Supreme Court ang CHR, PNP at DOJ na magsumite ng regular na ulat sa Korte Suprema at isapubliko ang detalyadong bilang ng mga extrajudicial killings at arbitrary detentions na nangyayari sa iba’t ibang panig ng bansa.
Kabilang sa mga naghain ng petisyon sa Korte Suprema sina Atty. Mary Jane Real, Maria Lulu Reyes, Joan Dymphna Saniel at Anna May Baquirin.
—-
