Nagpositibo sa COVID-19 ang isang Overseas Filipino Worker (OFW) na nagmula sa Canada na nauna nang tinurukan ng bakuna kontra COVID-19.
Ayon kay Dr. Mary Jean Loreche ng DOH-Central Visayas, ang naturang OFW ay isang babae at 25-taong gulang.
Mababatid ani Loreche na tumanggap ng bakuna kontra COVID-19 na gawa ng Pfizer ang naturang OFW noong ika-13 ng Enero.
Dumating ito noong ika-9 ng Pebrero sa Cebu at agad na sumailalim sa quarantine protocols.
Habang nitong ika-14 ng Pebrero, isinailalim na ang naturang OFW sa swab testing at lumabas na siya’y positibo sa virus.
Sa ngayon, ito na ang ikalawang kaso ng OFW na nagpositibo sa virus kahit pa naturukan na ang mga ito ng bakuna kontra COVID-19.
Ang unang kaso nito ay naitala sa katauhan ng isang OFW na nagmula sa UAE na umuwi ng bansa noong ika-25 ng Enero.