Inihirit sa Valenzuela City Regional Trial Court (RTC) ng isa sa mga sangkot umano sa 6.4 bilyong pisong shabu shipment na si Chen Ju Long o Richard Tan ang pagbasura sa kanyang kaso.
Si Chen ang may – ari ng warehouse sa Valenzuela kung saan ibinagsak ang nasa 600 kilo ng shabu.
Sa limang (5) pahinang urgent omnibus motion, hiniling ni Tan sa Valenzuela RTC Branch 171 na suspendihin ang issuance ng arrest warrant.
Wala umanong hurisdiksyon ang Korte sa kaso dahil sa ilalim ng batas ay mahalagang elemento ang lugar kung saan ginawa ang krimen.
Ipinunto ni Chen na ang tamang Korte ay sa Maynila sa halip na sa Valenzuela, at sa ilalim ng Section 1202 ng Tariff and Customs Code ay nagsisimula ang importation sa vessel o aircraft na pumapasok sa Philippine jurisdiction at nagtatapos sa pagbabayad ng duties at tax sa port of entry.
