Walang foul play sa pagkamatay ng umano’y middleman sa kasong pagpaslang kay broadcaster Percy Lapid.
Ayon ito kay Bureau of Corrections (BuCoR) Spokesman Gabriel Chaclag, base na rin sa initial report ng BuCor Health Service na walang senyales ng physical external injuries sa pagkasawi ni Crisanto Villamor.
Gayunman, sinabi ni Chaclag na hinihintay pa nila ang official at final autopsy result kabilang ang toxicology test na ilalabas ng National Bureau of Investigation (NBI) medico legal team.
Ipinabatid ni Chaclag na si Villamor ay dinala sa New Bilibid Prison Hospital (NBP) matapos itong mawalan ng malay, ala una y medya ng hapon nuong Martes, October 18.
Makalipas ang tatlumpung minuto ng resuscitation process si Villamor ay idineklarang patay na ng Medical Officer on duty.
Ang labi ni Villamor ay nasa Eastern Funeral Service sa Alabang.
