Nagbabahay-bahay na ang ilang lungsod sa Metro Manila maging sa Cavite para mapuntahan ang mga senior citizen na hirap nang makapunta sa mga vaccination site.
Ayon kay Dr. Nina Castillo-Carandang, miyembro ng national immunization technical advisory group for COVID-19 vaccine, ginawa ang pagbabahay-bahay upang matiyak na mabibigyan ng pagkakataon ang mga residenteng walang kakayahang pumunta sa vaccination sites para magpabakuna.
Sa pamamagitan din nito, maiingatan ang mga residente lalo na ang mga matatanda sa posibleng exposure sa nakahahawang sakit dahil hindi na nila kailangan pang lumabas ng bahay.
Gayunman sinabi ni Carandang na kailangan pa rin itong gawin ng may pag-iingat para maiwasan ang hawaan ng mga magpupunta sa mga tahanan na magbabakuna.