Maaaring pagmultahin ng P100,000 ang ice plant sa Navotas City kasunod ng nangyaring ammonia leak na ikinasawi ng dalawa katao habang 90 iba pa ang isinugod sa ospital.
Ito ang inihayag ng Department of Labor and Employment (DOLE), sakaling makitaan ng paglabag sa occupational safety and health standards ang naturang ice plant.
Ayon kay DOLE – occupational safety and health center executive Director Noel Binag, kanila nang iniimbestigahan ang insidente.
Kaugnay nito, pinaalalahanan ni Binag ang iba pang katulad na kumpaniya na sumunod sa umiiral na polisiya ng DOLE kabilang na ang pagkakaroon ng occupational safety and health trainings.
Dagdag ni Binag, dapat ding patuloy na makatanggap ng sahod ang apektadong manggagawa ng pansamantalang pagsasara ng ice plant.
Maaari rin aniyang humingi ng financial assistance sa employee’s compensation commission ang mga apektadong empleyado.