Tinatayang 2K mag-aaral sa pampublikong Elementarya at Senior High School sa Metro Manila ang balik-in-person classes na ngayong araw, sa gitna ng COVID-19 pandemic.
Ayon sa Department of Education, ang mga estudyante na nasa Kindergarten hanggang Grade 3 at Senior High ay mula sa 28 paaralan sa National Capital Region na pinili upang makibahagi sa pilot implementation ng face to face classes.
Ipinaliwanag ni Wilfredo Cabral, Officer-in-Charge ng Office for the Undersecretary ng DEPED-Human Resources na pinaka-huling nagpatupad ng face to face classes ang NCR dahil kamakailan lamang ipinako ang Alert status sa level 2.
Dumaan anya ang mga paaralan sa masusing preparasyon at sumunod sa patakaran na kailangan tulad ng safety seal gamit ang School Safety Assessment Tool.
Batay sa listahan ng DEPED sa 17 lokalidad ng NCR tanging Pateros ang hindi makikilahok sa pilot run. —sa panulat ni Drew Nacino
