Iginiit ng National Institute for Transparency and Accountability (NITA) na hindi kuwalipikado si dating Public Works Undersecretary Roberto Bernardo na maging state witness sa imbestigasyon sa maanomalyang flood control projects.
Ayon sa NITA, isa si Bernardo sa mga pangunahing operator ng sinasabing korapsyon sa mga flood control project ng pamahalaan.
Dahil dito, nanawagan ang grupo sa Department of Justice na ibasura ang aplikasyon ng dating DPWH official na mapabilang sa witness protection program.
Ipinunto ni NITA Executive Director Carlos Ayala na ipinakikita mismo ng sariling mga pahayag ni Bernardo na hindi lamang ito simpleng bahagi kundi isang “central operator” na nagbigay-daan sa paggalaw, paglalaan, at maling paggamit ng bilyun-bilyong pisong pondo ng bayan.
Binigyang-diin ni Ayala na malinaw ang direktang kontrol at pagkakasangkot ng dating DPWH official sa sinasabing flood control corruption.
Nabatid na nagretiro si Bernardo noong August 15, 2025, ilang linggo lamang matapos ilantad ni Pangulong Ferdinand Marcos Jr. ang flood control scam at ang labinlimang pangunahing contractor na sinasabing nakakubra sa karamihan ng mga infrastructure projects ng DPWH sa buong bansa.
