Posibleng mabasura ang ethics complaint laban kay Senador Ronald “Bato” dela Rosa kaugnay ng hirit na “no work, no pay” dahil sa hindi nito patuloy na pagpasok sa Senado kung diringgin sa kasalukuyan ng Senate Ethics Committee ang reklamo laban sa kanya.
Ito’y dahil wala pang patakaran sa ngayon ang Senado para sa “no work, no pay” para sa mga senador na matagal na absent, tulad ni dela Rosa.
Ayon kay Senate Ethics Committee Chairman JV Ejercito, wala pang provision sa “no work, no pay” sa rules ng Senado at ng komite; at para, aniya, magamit ang usaping ito laban kay dela Rosa, kailangang amyendahan ang mga patakaran ng Senado.
Sinabi pa ni Sen. Ejercito na marami pang nakapilang ethics complaint bago matalakay ang isinampa laban kay dela Rosa, kaya may panahon pa naman para maamyendahan ang rules; at kung madi-dismiss naman ang reklamo, maaari namang ulitin ang pagsampa ng complaint.
Dagdag ni Ejercito, hindi naman ito pagtatakip kay dela Rosa, at walang pinagtatakpan na sinumang senador ang komite.
