Pinasalamatan ni Human Rights Activist at dating Secretary-General ng Karapatan-Caraga Dr. Natividad “Naty” Castro, ang mga taong tumulong, nagdasal at nagpaabot ng suporta sakaniya makaraang makulong nito lamang Biyernes dahil sa alegasyon na miyembro umano siya ng Communist Party of the Philippines (CPP).
Sa video na ipinost ng dating tagapagsalita ng Korte Suprema na si Ted Te, sinabi ni Castro na siya ay nasa Bayugan City Police Station matapos siyang arestuhin ng Philippine National Police (PNP) at ng Armed Forces Intelligence Operatives sa Barangay San Perfecto sa bisa ng Warrant of arrest na inilabas noong January 30, 2020 ni Acting Presiding Judge Fernando Fudalan ng Regional Trial Court Branch 7 ng Bayugan City, Agusan Del Sur.
Aminado si Castro na nahihirapan siya sa kaniyang sitwasyon ngayon kung saan, pinabulaanan ng kaniyang mga kaanak na may koneksyon ito sa mga New People’s Army.
Nabatid na si Castro ay nahaharap sa kasong Kidnapping at Serious Illegal Detention kung saan, hindi siya pinapayagan ng mga otoridad para makausap ang kaniyang Legal counsel at pamilya gayundin ang gamot nito para sa kaniyang Hypertension at Diabetes.
Hiniling din ng mga ka-batch ni Castro sa Medical School maging ng UP-Manila na palayain siya kaagad, at mabigyan ng hustisya kaugnay sa pagkakaaresto ng PNP kay Castro na isang Alumna ng UPM College of Medicine Class of 1995. —sa panulat ni Angelica Doctolero
