Hinimok ni Vice President Sara Z. Duterte ang mga Pilipino na gawing mas makabuluhan ang pagdiriwang ng Pasko sa pamamagitan ng pagbabahagi ng biyaya at malasakit sa kapwa, lalo na sa mga nahihirapan, may karamdaman, ulila, walang tahanan, at mga biktima ng sakuna at karahasan.
Sa kanyang mensahe ngayong Pasko, sinabi ng Pangalawang Pangulo na sa gitna ng iba’t ibang hamon sa buhay, nagiging ganap ang diwa ng Pasko kapag ang mga biyayang tinatanggap ay ibinabahagi sa iba.
Ayon pa kay VP Sara, sa kabutihan ng loob nagmumula ang pag-asa, katatagan, at pananampalataya na gumagabay sa mga indibidwal, pamilya, at sa buong bansa.
Hinangad din ni Duterte ang kaligayahan ng bawat Pilipino kasama ang kanilang mga mahal sa buhay at nanawagan na ipagdasal ang kapayapaan at katatagan ng bansa.
Binigyang-diin pa ng Bise Presidente na ang pusong nagpapasalamat ay mapagbigay, mapagmahal, at mapagpatawad.
Nanawagan din ang Pangalawang Pangulo na mahalin ang Pilipinas—para sa Diyos, sa bayan, at sa bawat pamilyang Pilipino.
