Isinusulong ni Senador Antonio Trillanes IV ang pagsasapubliko ng mga detalye sa executive session ng Senado kaugnay sa reinvestigation ng Mamasapano encounter.
Ayon kay Trillanes, maghahain siya ng mosyon ngayong araw upang malinawan sa mga impormasyong ibinigay sa closed door hearings ng joint committee on public order, peace, unification and reconciliation at finance.
Dapat anyang mabatid kung may epekto ang sinasabing recorded audio ng pag-uusap nina Senador Bongbong Marcos at Office of the Presidential Adviser on the Peace Process Secretary Ging Deles sa national security.
“Sa akin, siguro pakinggan na muna namin sa executive session at tignan namin kung mayroong national security implication, tatantiyahin po muna namin kung anong implications nito kung sakaling ilalabas, kapag nakita natin si Secretary Deles at Senator Bongbong Marcos at merong nag-rerecord pero tungkol sa BBL.” Pahayag ni Trillanes.
Marcos
Kinumpirma ni Senador Ferdinand Bongbong Marcos na siya at si Presidential Adviser on the Peace Process Teresita Ging Deles ang nag-uusap sa ibinunyag na audio recording ng isang retired general kaugnay sa Mamasapano encounter.
Kasunod na rin ito nang paglalabas ni retired General Diosdado Valeroso ng nasabing audio recording bilang pagtatakip aniya sa nasabing insidente.
Hindi naman tinukoy ni Valeroso kung sino ang mambabatas at isang opisyal ng gobyerno na nag-uusap sa naturang audio recording na aniya’y natanggap niya sa kaniyang e-mail nitong nakalipas na January 19.
Ayon kay Marcos, unauthorized ang recording ng kanilang pag-uusap ni Deles at nangyari ito aniya sa kanyang opisina mismo.
Hindi niya aniya batid kung sino ang nag-record ng usapan subalit halos nasa 50 katao ang nasa opisina niya nang maganap ang pag-uusap nila ni Deles.
Sinabi ni Marcos na bahala na ang taumbayan na mag desisyon kapag napakinggan ang naturang recording kung may pagtatangka ngang cover up sa usapin at bahala na rin si Senador Grace Poe, Chair ng Senate Committee on Public Order kung ilalabas ito sa reopening ng imbestigasyon sa Mamasapano encounter.
Binigyang diin ni Marcos na malinaw sa pag-uusap nila ni Deles ang katiyakang kahit anong mangyari ay tuloy ang deliberasyon ng Kongreso sa panukalang BBL o Bangsamoro Basic Law.
By Drew Nacino | Ratsada Balita | Judith Larino
