Tinawag na ugok ni Davao City Vice Mayor Paolo Duterte si Senador Antonio Trillanes kasunod nang ginawang pagsisiwalat ng senador na mayroon umanong bilyun-bilyong pera sa bangko si Pangulong Rodrigo Duterte at ilang pang kapamilya nito.
Ayon kay Paolo Duterte, una na siyang inakusahan ng senador na isang drug user ngunit napatunayan nyang hindi sya gumagamit ng illegal na droga kaya ngayon ay isyu naman sa kwestyonableng yaman ang ibinabato nito.
Banat ni nakababatang Duterte, dapat ay magpa – psychiatric test na ang senador dahil malinaw na may problema ito sa pag-iisip.
Sakali aniyang mapatunayan na mayroon nga syang bilyong piso sa bangko ay handa syang ipamudmod ang lahat ng nasabing pera sa mga biktima ng lindol sa Surigao.
Hinamon pa ng bise – alkalde si Trillanes na magbitiw na sa pagiging senador dahil wala naman itong silbi at hindi na rin pinaniniwalaan ng mga tao.
By Rianne Briones | Aileen Taliping (Patrol 23)
