Tinambangan ang dating alkalde ng San Jose de Buan sa lalawigan ng Samar habang patay naman ang kanyang bodyguard sa naturang lugar kaninang alas-1:00 ng madaling araw.
Batay sa impormasyong ipinarating ng San Jose de Buan Municipal Police Station dito sa Kampo Crame, papauwi na sana sina dating Mayor Ananias Rebato at ang bodyguard nito na si Severino Tesoro Jr. nang mangyari ang insidente.
Papasakay na umano sa kanyang service vehicle ang alkalde matapos dumalo sa Sarayaw Fiesta sa Barangay Babaclayon nang pagbabarilin ito ng hindi pa tinukoy na suspek.
Nagawa pang balikan ng putok ni Tesoro ang suspek na agad nitong ikinamatay subalit sinawing palad din naman ang naturang bodyguard.
Kritikal naman ang kundisyon ni Rebato nang isugod ito sa isang pagamutan sa Tacloban habang nananatili sa morgue ng Samar Provincial Hospital ang labi ng suspek at nasa Faith Funeral Homes naman ang labi ni Tesoro.
—-