Magsasagawa ang Pilipinas ng clinical trials para sa anti-parasitic drug na ivermectin upang mapag-aralan kung ito ba ay maaaring gamiting panggamot laban sa COVID-19.
Sinabi ni Science and Technology Secretary Fortunato Dela Peña na si Dr. Aileen Wang ang mangunguna sa isasagawang clinical trials sa Philippine General Hospital Quarantine Center.
Nakapaglaan na rin aniya ng pondo para dito at sa oras na matapos ang trial, inaasahan na magkakaroon ng mas mapagkakatiwalaang datos kaugnay sa paggamit ng ivermectin bilang isang antiviral agent.
Kung sakali aniya na magkakaroon ito ng positibong resulta, maaaring magamit ito o makabawas ng virus shedding sa mga pasyenteng mayroong mild at moderate na COVID-19.
Magugunitang nanging kontrobersyal ang ivermectin matapos na hikayatin ng ilang mambabatas sa health authorities na irekomenda ang paggamit ng naturang anti-parasitic drug bilang panlaban sa COVID-19.
