SPORTS

Umakyat na sa unang puwesto ang Rain or Shine Elasto Painters sa PBA Philippine Cup standings matapos padapain ang San Miguel Beermen sa score na 99-84 sa Mall of Asia Arena sa Pasay City.

Kapwa kumamada ng 15 points sina Raymond Almazan, Beau Belga at Jeff Chan para sa Rain or Shine dahilan upang maisukbit ang solo lead taglay ang kartadang 3-0.

Nagdagdag naman sina Gabe Norwood at Rookie Maverick Ahanmisi ng tig-14 points para sa Painters.

Sa third quarter pa lamang ay kinontrol na ng Rain or Shine ang laban sa pamamagitan ng epektibong outside shooting.

Sa huling apat na minuto ng laro ay naitala ng painters ang 83-73 lead hanggang sa hindi na ito lumingon na naging dahilan upang ilampaso ang defending champion.

By Jelbert Perdez 

Umaasa pa rin si 8-division World Champion Manny Pacquiao na sa Pilipinas maidaraos ang kanyang huling laban bago magretiro sa 2016.

Ayon kay Pacquiao, kanila pa itong tatalakayin ni Top Rank CEO Bob Arum.

Samantala, inanunsyo ni Pacquiao na sinuman kina undefeated WBO Light Welterweight Champion Terence Crawford at dati niyang sparring partner na si Amir Khan ang kanyang susunod na makakalaban.

Muling nanindigan si Pacquiao na huling laban na niya ito dahil sa seryoso na aniya siya sa pagtulong sa mga Pilipino.

By Ralph Obina 

Inilampaso ng Charlotte Hornets ang kalabang Chicago Bulls sa kanilang pagtutuos kaninang umaga sa iskor na 130-105.

Ito ang unang panalo ng Hornets sa season na ito ng NBA.

Umalagwa ng husto para sa koponan ng Hornets si Jeremy Lamb na kumana ng 20 puntos na sinegundahan naman ni Jeremy Lin na may ambag na 15 puntos.

Bukod sa mga 3- point shots na binitiwan ni Lin, malaking bagay para makalayo nang husto ang Hornets sa Bulls ay ang mga tres na pinakawalan ni Spencer Hawes.

By Ralph Obina 

Ginulat ng Philippine youth basketball team ang three-time defending champion China matapos isukbit ang score na 78-72 sa bago ang knockout rounds ng 2015 FIBA Asia Under-16 Championship sa Jakarta, Indonesia.

Si Gian Mamuyac ang nanguna sa Batang Gilas taglay ang kanyang 22 points at five assists habang si team captain SJ Belangel ay nag-ambag ng 11 points kung saan tig-10 points naman ang tinipa nina Harvey Pagsanjan at Jason Credo.

Matatandaang hindi pa natatalo sa kahit isang laro ang China sa tatlong edisyon ng FIBA Asia Under-16 Competition kung saan sila ang nagka-kampeon.

Dahil sa tagumpay na ito ay natapos ng mga Pinoy ang second round kasama ang China at South Korea na mayroong 4-1 records sa Group F.

Batay naman sa quotient system, nasa unang puwesto ang China sa Group F, pangalawa ang Pilipinas at third ang Korea.

By  Jelbert Perdez 

Pinangunahan ni Lebron James ang panalo ng Cleveland Cavaliers kontra Philadelphia 76ers sa iskor na 107-100.

Nakapagbaon si Lebron ng 22 puntos dahilan upang maabot nito ang 25,000 puntos sa kanyang career.

Nakapag-ambag naman sina Mo Willams ng 21 puntos habang 15 puntos naman ang nagawa ni Kevin Love para sa Cavs.

Samantala, pinadapa naman ng San Antonio Spurs ang New York Knicks sa kanilang paghaharap sa iskor na 94-84.

By  Ralph Obina  

Umaasa pa rin ang British boxing star na si Amir Khan na siya ang huling makakalaban ni 8-division world champion Manny Pacquiao bago magretiro ang Pambansang Kamao.

Ayon kay Khan, maganda ang itinatakbo ng negosasyon sa pagitan ng kaniyang panig at kampo ni Pacquiao para sa niluluto nilang laban.

Sinabi ni Khan na hinaharap na sila ngayon ng team Pacquiao kaya’t unti -unti aniya ay nagkakaroon ng pag-asang siya ang makatunggali ni Pacquiao.

Sakali mang muling mapurnada aniya ang pangarap nitong laban kontra kay Pacquiao, inihayag ni Khan na wala siyang magagawa kundi ang maghanap na lamang ng iba.

By  Ralph Obina   

Wagi kontra Denver Nuggets ang Oklahoma City Thunder matapos pangunahan ni Kevin Durant ang panalo ng koponan sa iskor na 93-117.

Kumana ng 25 puntos si Durant na sinegundan naman ni Serge Ibaka na nakapagbaon ng 18 puntos.

Samantala , hindi naman sumapat ang tig-15 puntos nina Danilo Gallinari at Will Barton para i-angat ang Nuggets at maibaba ang kalamangan ng Thunder.

Dahil dito, nananatiling walang talo sa NBA ang Thunder sa tulong ng kanilang bagong coach na si Billy Donovan.

By  Ralph Obina 

Wala pa ring talo sa tatlong magkasunod na laro ang Philippine National Youth Basketball Team sa FIBA Asia Under-16 Championship.

Kasunod ito ng ginawang pagdispatsa ng batang Gilas sa Iraq sa score na 78-69 sa kanilang bakbakan sa second round Group F sa Britama Arena sa Jakarta, Indonesia.

Si Gian Mamuyac ang nanguna sa koponan ng mga Pinoy sa pamamagitan ng score na 16 points habang si Harvey Pagsanjan naman ay nagtala ng 13 points.

Nag-ambag din si team captain sj Belangel ng 10 points at team-high six assists dahilan upang magwagi ang batang Gilas.

Dahil sa panalo, may puwesto na ang national youth basketball team sa quarterfinals kung saan nasa hanay nila ang China, Japan at Chinese Taipei na wala pa ring talo sa FIBA Asia tilt.

Makakasagupa ng batang Gilas ang South Korea bago ang three-time defending champion China sa isang Group F match bago sasabak sa knockout rounds.

By  Jelbert Perdez