SPORTS

Tuloy ang training ni Senador Manny Pacquiao, dalawang araw bago ang kanyang laban kay Jessie Vargas sa Las Vegas Nevada.

Hindi sinunod ni Pacquiao ang payo ng kanyang coach na si Buboy Fernandez na magpahinga na lamang sa natitirang dalawang araw dahil maaga syang nagsimula ng training noong Agosto.

Labing isang (11) rounds ng jogging ang ginawa ni Pacquiao sa may University of Las Vegas tract oval sa loob ng 28 minuto at 400 sit ups.

Ayon kay Pacquiao, nagpapawis lamang sya at pandagdag lamang ito ng kumpiyansa sa sarili.

Binigyang diin ni Pacquiao na dapat alalahanin na sya ang challenger at kampeon si Vargas kayat hindi sya dapat maging kampante.

“Parang torong baka na nakalabas sa kulungan”

Ito naman ang kundisyong nais na makita ni Coach Buboy Fernandez kay Senador Manny Pacquiao sa ginagawa nilang paghahanda para sa laban nito kay Jessie Vargas.

Hindi rin binigyang pansin ni Fernandez kung mas matangkad man ng tatlong pulgada si Vargas kay Pacquiao.

Kahit anya gaano katangkad ay liliit rin kapag tinamaan sa katawan.

Una rito, sinabi ni Pacquiao na magiging maganda ang laban nila ni Vargas dahil kilala itong lumalaban at nakikipagpalitan ng suntok.

By  Len Aguirre

Ang laban kay WBO Bantamweight Champion Jessie Vargas sa darating na Linggo ang magdidikta umano ng magiging kapalaran ni 8-division world champion Senator Manny Pacquiao sa mga plano nito sa kanyang boxing career.

Ito ang naging pahayag ni Pacman bago ang napipintong paghaharap nila ni Vargas sa Linggo.

Sinabi ni Manny na dapat galingan ni Vargas ang mga bibitiwan nitong suntok sa kanya.

Dahil kapag nagkataon ay mawawalan na lamang ito ng ulirat at uuwing luhaan.

Ayon kay Pacman depende sa kalalabasan ng kanilang laban ang magiging plano niya sa hinaharap sa ibabaw ng ring.

By Mariboy Ysibido  

Balik sa pagiging World Number One si Serbian tennis star Novak Djokovic.

Ito ay matapos talunin ni Djokovic si Gilles Muller ng Luxembourg sa Paris Masters.

Pinataob ni Djokovic ang kalaban sa iskor na 6-3 at 6-4.

Ngayong linggo inaasahang hahawakan ng 29-anyos na si Djokovic ang top spot mula sa Wimbledon Champion na si Murray.

By  Ralph Obina

Nalasap ng San Antonio Spurs ang kanilang unang pagkatalo sa 2016-2017 regular season ng NBA.

Inilampaso ng Utah Jazz sa score na 106-91 ang Spurs na isa sa pinakamalakas na team sa Western Conference Division.

Kumamada ng 30 points si Kawhi Leonard habang nag-ambag ng 22 points si George Hill para sa Utah Jazz.

Hawak na ng San Antonio ang kartadang 4 wins at 1 loss habang may tig-dalawang panalo at talo na ang Jazz sa Western Conference.

Ito ang unang regular season ng 5 time NBA champion na Spurs na wala si Tim Duncan na nagretiro noong Hunyo.

By Drew Nacino     

Photo: Screengrab from USA Today Sports

Balik-golf si dating World Number One Tiger Woods sa Hero World Challenge sa Bahamas.

Ayon kay Woods, excited siyang maglaro muli sa tinawag pa niyang terrific tournament sa kabila ng mga umano’y concerns sa kanyang kondisyon matapos ang dalawang operasyon sa kaniyang likod noong 2014.

Tila niyanig ni Woods ang mundo ng golf nang hindi nito ituloy ang una nang plinanong pagbabalik sa golf sa Safeway Open sa California.

Ito umano ang nagdulot ng uncertainty o walang kasiguruhan sa karera ni Woods matapos ang 16 month lay off.

By Judith Larino   

Dumating na sa Las Vegas, Nevada si 8-division world champion Senator Manny Pacquiao kasama ang buong team nito.

Kakaunti na lamang ang nakasama ng Pinoy ring icon sa dating malaking entourage nito patungong gambling capital ng mundo.

Nabatid na tanging 20 katao lamang ang naging sakay ng 54-capacity bus na may litrato ni Pacquiao.

Kakaunti ito kung ikumpara sa mga nagdaang laban ng tinaguriang fighting senator kung saan jam-packed ang naturang bus magmula sa Wild Card Gym sa Los Angeles California papuntang Las Vegas.

Ayon sa isang source, posibleng marami ang hindi na sumama sa Las Vegas sapagkat tumanggi raw si Pacquiao na sagutin ang bayad sa hotel na tutuluyan ng mga supporters nito.

President’s support

Ipinagdarasal ng Pangulong Rodrigo Duterte para manalo si Senador Manny Pacquiao sa laban nito kay Jessie Vargas sa Las Vegas, Nevada sa darating na araw ng Linggo.

Sinabi ng Pangulo na dapat ay ma-knockout kaagad ni Pacman si Vargas para hindi masyadong mapagod ang Pambansang Kamao.

Tinukoy pa ni Pangulong Duterte ang aniya’y miracle punch ni Pacman na nagpatumba na sa mga malalaki at malalakas na boksingero sa mundo.

By  Mariboy Ysibido | Judith Larino

Photo Credit: AP 

Idineklara ni Hall of Famer Coach Freddie Roach na “ready to rumble” na si Senator Manny Pacquiao para sa laban sa Linggo kontra kay WBO Welterweight Champion Jessie Vargas.

Ginawa ni Roach ang pahayag makalipas na matapos na ni Pacman ang umaabot sa 90 rounds ng sparring sessions, 200 rounds ng mitts at 3,000 milya sa pagtakbo.

Una nang sinabi ni Pacquiao na babawin niya ang kanyang korona.

Ang nasabing championship belt ay unang nang naagaw sa kanya ni Floyd Mayweather Jr.

By  Mariboy Ysibido