SPORTS

Hindi sang-ayon ang maraming mga boxing fans at boxing analysts sa pagkapanalo ni Andre Ward kay Sergev Kovalev.

Matatandaang matapos makuha ng bagong WBA, WBO , IBF light heavyweight champion na si Ward ay nagsigawan ang mga fans at hindi kuntento sa desisyon ng mga judges na nagbigay ng 114-113 na unanimous desisyon kay Ward.

Marami rin ang nagsabing isang pinakamalaking nakawan sa larangan ng boxing ang pagkapanalo ni Ward.

Pinuna naman ni Kathy Duva ang promoter ng Russian boxer na mas maraming hawak ang ginawa ni Ward at dapat sa UFC na lamang siya sumali.

Agad naman na bumuwelta si Virgil Hunter ang trainer ni Ward na masama lamang ang loob ng kampo ni Kovalev dahil sa kanilang pagkatalo.

By  Mariboy Ysibido  

Binasag na ni Floyd Mayweather Jr. ang kanyang pananahimik hinggil sa umuugong na posibleng rematch nila ni Manny Pacquiao.

Subalit, ayon kay Mayweather, hindi na siya interesado pang labanan sa ikalawang pagkakataon si Senador Pacquiao.

Giit ng retiradong American boxer, masaya na siya sa naging wakas ng kanyang karera kung saan hawak niya ang rekord na 49 wins, zero loss at halos 40 ang knockouts.

Sinabi ni Mayweather na kaya siya nagpasyang magretiro ay dahil ayaw niyang matulad kay boxing legend Muhammad Ali na hirap nang magsalita at maglakad nang talikuran ang pagboboksing.

By   Jelbert Perdez    

Nasungkit ni second rank Serbian Tennis Star Novak Djokovic ang ikatlong sunod na panalo nito sa nagpapatuloy na ATP Finals.

Ito ay makaraang idispatsa ng 12-time grand slam champion ang kalabang si David Goffin sa iskor na 6-1 at 6-2.

Ikinatutuwa ni Djokovic na umaayon sa kanyang mga plano ang performance ng kanyang mga laro.

Dahil dito, buhay ang pag-asa ni Djokovic na mabawi ang world number one ranking bago matapos ang taon makaraang maagaw ito ni Andy Murray.

By  Ralph Obina

Nakatuon lang umano sa kikitain ang ikinakasang muling paghaharap nina undefeated world champion Floyd Mayweather Jr. at pound-for-pound king Senator Manny Pacquiao.

Ito ang pananaw ng HBO boxing commentator na si Jim Lampley.

Ayon kay Lampley, wala sa tamang perspektibo ang nilulutong rematch nina Pretty Boy at Pacman dahil pinangunahan ng pagkagahaman sa pera ang mga nasa likod nito.

Dagdag pa ni Lampley, gaya ng pahayag ni Juan Manuel Marquez, wala itong magandang kahihinatnan dahil walang kakaiba sa mata ng boxing fans.

By Mariboy Ysibido  

Pinataob ni world number one Andy Murray ang pambato ng Japan sa ATP World Tour Finals na si Kei Nishikori.

Bagamat naging pahirapan ang laban na tumagal ng mahigit tatlong oras, nanaig pa rin ang pagiging beterano sa tennis court ni Murray kung saan ay tinalo nito ang kalabang si Nishikori sa iskor na 6-7, 6-4 at 6-4.

Dahil dito, buhay na buhay ang pag-asa ni Murray na masungkit ang naturang titulo bago magtapos ang taon.

Susunod na makakasagupa ni Murray si US Open Champion Stan Wawrinka.

By  Ralph Obina  

Pasok na sa koponan ng San Miguel Beermen ang dalawang dating manlalaro mula sa D-League gayundin ng De La Salle Green Archers ng UAAP.

Maglalaro para sa koponan sa loob ng dalawang taon sina Van Opstal ng Archers habang isang taon naman si Rashawn McCarthy ng D-League.

Gayunman, hindi na nagdetalye pa ang pamunuan ng Beermen hinggil sa kung magkano ang nilagdaang kontrata ng dalawa para sa koponan.

Ngunit, inaasahang malaking tulong ang dalawa lalo’t nakatakdang makaharap ng Beermen ang Star Hotshots sa pagbubukas ng bagong season ng PBA.

By  Jaymark Dagala 

Photo: FOX Sports Asia

Pasok na sa semi- finals ng ATP tour finals si Serbian tennis star Novak Djokovic.

Ito ay matapos ang gitgitang panalo ni Djokovic kontra kay Milos Raonic sa iskor na 7-6, 7-6.

Aminado si Djokovic na nahirapan siya nang husto sa naturang laban ngunit ganuon na lamang   siya   kadeterminadong mabawi kay Andy Murray ang world number one ranking.

Sa naturang panalo, naitala ni Djokovic ang ika-dalawampung panalo nito sa huling 21 laban nito.

By: Ralph Obina

Tagumpay ang Cleveland Cavaliers sa kanilang pakikipagharap sa Toronto Raptors.

Nanaig ang matinding opensa ng Cavs kontra Raptors dahilan manalo ang defending champion sa iskor na 121-117.

Nanguna sa panalo ng Cavs si Lebron James na nakapagtala ng 27 puntos at 14 na assists.

Sinegundahan naman ito ni Channing Frye na nakapagtala ng 21 puntos.

Ito na ang ika-anim na panalo ng Cavs sa pitong home games nito habang ang Raptors naman ay natalo matapos ang apat na sunod nilang panalo.

By  Ralph Obina   

Sinimulan na ni world number one Andy Murray ang kampanya nito sa ATP World Tour Finals.

Ito ay matapos talunin ni Murray ang Croatian na si Marin Cilic sa O2 Arena.

Si Murray ay sinalubong ng tila bayani ng home crowd nang tumayo ito sa Blue Cort para sa kanyang unang laban simula nang mapasakamay muli ang top spot.

Tila nahirapan si Murray na matralo si Cilic na halos pumantay na sa kanyang galing subalit namayani pa rin ang strategy ng bagong world number one.

Kailangang maungusan ni Murray si Novak Djokovic ng Serbia na siyang nanaig sa tournament sa nakalipas na apat na taon para matiyak ang pagiging rank one sa pagtatapos ng taong 2016.

By  Judith Larino