Imposibleng mangyari ang kagustuhan ni undefeated world boxing champion Floyd Mayweather Jr. na makaharap sa boxing ring si Mixed Martial Artist Conor McGregor.
Ayon kay UFC President Dana White, ito ay dahil mayroong exclusive contract si McGregor at tanging sa Octagon lang ito maaring lumaban.
Maliban dito, binigyang diin din ni White na magkaiba ang sports category ng dalawang manlalaro.
By Katrina Valle
Nasungkit ng De La Salle Green Archers ang senior men’s basketball title ng UAAP Season 79.
Ito’y matapos ilampaso ng La Salle ang kanilang arch-rival Ateneo Blue Eagles sa game 2 ng finals series sa Araneta Coliseum sa score na 79-72.
Si King Archer Jeron Teng ang nanguna sa koponan taglay ang kanyang 28 points.
Ito ang ikalawang sunod na kampeonato na nakuha ni La Salle Coach Aldin Ayo na siyang gumabay sa Letran Knights sa pagsungkit ng titulo noong nakaraang taon sa NCAA bago lumipat sa Archers.
By Jelbert Perdez
Lalarga na ang ikalawang round ng senior men’s basketball finals ng UAAP season 79, mamayang hapon.
Tatangkain ng Dela Salle Green Archers na sungkitin ang kanilang ika-siyam na kampyonato.
Sasagupain ng La Salle ang kanilang arch-rival Ateneo Blue Eagles sa game 2, sa Araneta Coliseum, mamayang alas tres y medya.
Inaasahang mas matinding aksyon ang ipakikita ng Ateneo dahil ito na ang kanilang do-or-die game kontra Archers na mayroong twice to beat advantage.
Aminado naman si La Salle coach Aldin Ayo na matinding pressure ang nararamdaman nila ngayon dahil nasa kanila ang momentum.
Magugunitang nalusutan ng Archers ang Eagles sa score na 67-65 sa game 1 ng finals, noong Sabado.
By Drew Nacino
Nanawagan sa mga fans ng Cleveland Cavaliers si all-star guard Kyrie Irving na ‘wag mabahala sa tatlo nilang sunod-sunod na talo.
Aniya, hindi umano dapat ika-alarma ang pangyayari.
Tinawag pa ni Irving na “miscommunication” lamang at may maling diskarte sa mga huling bahagi ng kanilang mga laro.
Aniya, sa lalong madaling panahon ay mareresolba rin nila ang sablay na mga laro.
Tiniyak din ni Irving na bilang champion team, lalo lamang daw silang gagaling at hindi dapat bigyan ng kontrobersiya ang nangyaring pagkatalo nila.
By Mariboy Ysibido
Umaasa ang golf champion na si Tiger Woods na makukuha niya ang record 18 majors na minsan nang nakamit ni Jack Nicklaus.
Sa larong ipinamalas ni Woods sa Hero World Challenge, inamin nitong hindi pa ito lubusang nakababalik sa rurok ng galing sa paglalaro.
Sinabi rin ng 14-time golf champion, napapagod siya kapag medyo napapatagal na ang laro.
Gayunpaman, positibo si Woods na nakikita nyang may progreso sa kanyang performance.
Matatandaang nagpahinga ng mahigit isang taon mula paglalaro ng golf si Woods dahil sa tinamong back injury.
By: Avee Devierte
Dinurog ni Filipino-American Mixed Martial Artist Brandon Vera ang japanese challenger na si Sekine Hideki sa kanilang bakbakan sa ‘One: Age of Domination’ sa Mall of Asia Arena, kagabi.
Tinapos ng one heavyweight champion ang laban sa unang round lamang ng kanilang championship fight at sinikwat ang technical knockout o TKO victory.
Dahil sa panalo, umakyat ang rekord ni Vera sa 15 wins, 7 losses at 1 draw habang nakalasap si Hideki ng kanyang unang talo sa walong laban.
Matatandaang nasungkit ni Vera ang bakanteng titulo noong December 2015 matapos i-knockout si Paul Cheng ng Taiwan sa kanilang bakbakan na umabot lamang ng 26 seconds.
Sa co-main event, nadepensahan naman ni Bantamweight Division King Bibiano Fernandes ang kanyang korona nang masungkit ang split-decision victory laban sa challenger na si Reece Mclaren.
Panalo naman ang isa pang Filipino MMA Fighter na si Edward Kelly laban kay Sunoto Peringkat sa pamamagitan ng TKO habang pinasuko ni Honorio Banario ang katunggali na si Rajinder Singh Meena.
By Jelbert Perdez
Hindi muna makapaglalaro para sa Alaska Aces ng PBA sina Vic Manuel at Ping Exciminiano.
Ito’y makaraang suspendihin ang dalawa dahil sa paglalaro sa labas ng kanilang liga.
Bagama’t hindi idinetalye kung saan naglaro ang dalawa, mahigpit naman ang koponan hinggil dito.
Dahil dito, malaking hamon ngayon para sa Aces ang pagkawala ng dalawa sa kanilang laban ngayong araw kontra sa San Miguel Beermen dahil sa injury na dinanas ng iba pa nilang players tulad nila Calvin Abueva, Sonny Thoss at Rome dela Rosa.
By Jaymark Dagala
Pinayuhan ni dating WBO Welterweight Champion Jessie Vargas si Ukrainian Boxer Vasyl Lomachenko na ituon ang atensyon sa iba pang boksingero.
Ito ay sa harap ng nilulutong laban ni Lomachenko kay 8-division world champion Manny Pacquiao.
Iginiit ni Vargas na lugi si Lomachenko kung hahabulin nito ang timbang ng fighting senator na 140 pounds.
Sinabi ni Vargas na kumportable kasi si Lomachenko sa timbang na 135 pounds.
Matatandaang si Vargas ang pinakahuling tinalo ni Pacquiao sa pagbabalik nito sa boksing.
By Ralph Obina
Bigo ang San Miguel Beermen na maungusan sa matinding depensa ng Phoenix Fuel Masters matapos matalo 92-85.
Umarangkada ang ginawang 22 points ni JC Intal habang mayroong 14 points si Matthew Wright at 13 points naman si Gelo Alolino.
Agaw pansin rin ang ginawang 18 rebounds, apat na assists at anim na puntos ni Willy Wilson.
Hawak na ng Fuel Masters ang kalamangan ng laro mula pa noong unang quarter kung saan nagtapos sa first half sa score na 49-35.
Dahil sa panalo ay mayroon ng record ang Fuel Masters na 1-1.
By Mariboy Ysibido
Photo Credit: PBA Images
Handang-handa na si one heavyweight world champion Brandon “The Truth” Vera para sa kanyang kauna-unahang title defense fight laban kay Hideki “Shrek” Sekine ng Japan.
Ang pagtutuos na tatawaging, “One: Age of Domination,” ay magaganap sa Disyembre 2, sa MOA Arena.
Sinabi ni Vera na binansagang Shrek si Sekine dahil isa siyang higante at maaaring mabilis din siyang mapapagod matapos ang ilang round.
Si Sekine ay mayroong black belt sa judo, brown belt sa Brazilian jiu-jitsu at mayroong record na 7-0 kung saan ang tatlong panalo ay sa pamamagitan ng knock out habang ang tatlo naman ay dahil sa submission.
By Katrina Valle