SPORTS

Pumanaw na ang legendary NBA broadcaster na si Craig Sager sa edad na 65.

Si Sager ay matagal nang nakikipaglaban sa sakit na leukemia.

Inalala naman ng kanyang pamilya at fans ang higit 3 dekada nito sa larangan ng sports broadcasting na nagbigay inspirasyon sa maraming basketball lovers.

Ani ng ilan hindi nila makakalimutan ang makukulay na kasuotan ni Sager sa NBA interviews at ang kakaibang determinasyon nito habang nasa coverage.

Sinabi naman ni NBA Commissioner Adam Silven na lubos na ikinalulungkot ng buong NBA ang pagpanaw ni Sager.

Dalawang araw bago namatay ay napabilang si Sager sa Sports Broadcasting Hall of Fame na isa sa mga humubog at nagbigay kulay sa sports.

Pinag-iisipan na 13 time NBA all-star Dirk Nowitzki ang posibleng pagreretiro.

Ayon sa Dallas Mavericks forward, nakadepende pa aniya ito sa kanyang magiging performance sa susunod na taon.

Gayunman, pipilitin aniya ni Nowitzki na umabot sa 2018 para maipagdiwang ang kanyang ika-dalawampung taon sa Dallas Mavericks.

Ang 38 taong gulang na German player na ay nakaranas ng Achilles tendon problem at hindi na nakapaglaro sa NBA simula Nobyembre.

By Ralph Obina 

Nakabawi sa huling quarter ang Alaska Aces para tuluyang pabagsakin ang Meralco Bolts 81-79.

Bumandera ang nagawang 22 points at 10 rebounds ni Vic Manuel habang nag-ambag ng 9 points, seven rebounds, five assists at dalawang blocks si Calvin Abueva.

Nakapagtala din ng tig-siyam na puntos sina Chris Banchero at Jaypee Mendoza.

Umabot pa sa mahigit na 10 points ang kalamangan ng Bolts hanggang sa tuluyang mahabol ito ng Aces.

Dahil sa panalo tabla na sa 2-2 ang Aces sa Bolts.

By Mariboy Ysibido 

Humakot ng labing pitong (17) medalya pambato ng Pilipinas sa 3rd Karate Mayor’s Cup Championship sa Kuala, Lumpur Malaysia.

Kabilang sa mga nasungkit ng Association for the Advancement of Karatedo o Team AAK ng Pilipinas ay anim na gintong medalya, anim na pilak at limang tansong medalya.

Nagtagisan ng galing sa karatedo ang may 450 participants mula sa 13 bansa at 45 karate clubs.

Kabilang sa mga nakasungkit ng gintong medalya si Matthea Lazo ng Immaculate Concepcion Academy Greenhills, Renzel Asistido ng Collegio de San Agustin, Joan Lumbao ng Saint Pedro Poveda College at Paulo Gorospe ng Xavier School Greenhills na nakakopo ng dalawang gintong medalya.

By  Ralph Obina 

Binalaan ni Philippine Sports Commission Chairman Butch Ramirez ang mga National Sports Association (NSA) na hindi magpapakita ng magandang performance sa 29th Southeast Asian Games sa Kuala Lumpur, Malaysia.

Ayon kay Ramirez, hindi siya mag-dadalawang-isip na tanggalan ng pondo ang mga NSA kung mabibigo sa Sea Games sa susunod na taon.

Nakadidismaya anya ang ipinakita ng Pilipinas sa dalawang nakalipas na sea games.

Magugunita noong 2015 SEA Games sa Singapore ay 6th overall lamang sa medal tally ang Pilipinas habang 7th overall noong 2013 sa Myanmar.

Iginiit ni Ramirez na may matinding pressure sa Pilipinas dahil gaganapin sa Davao City ang 30th Sea Games sa taong 2019.

By Drew Nacino   

Sabik na sabik nang makita at makaharap ng personal ng Cambodian Prime Minister na si Hun Sen ang pambansang kamao at Senador Manny Pacquiao.

Si Prime Minister Sen ang isa sa mga number one fan ng fighting senator.

Ayon sa ulat, maglalalaan ng red carpet ang Prime Minister ng Cambodia para sa iniidolo nitong boksingero.

Matatandaang si Prime Minister Sen ay pumusta kay Pacquiao sa laban ng Pambansang Kamao kontra kay undefeated boxer Floyd Mayweather Jr.

Nang matalo si Pacquiao kay Mayweather noon ay hindi nagbayad ng pusta ang Punong Ministro dahil sa paniniwalang si Pacman ang tunay na nanalo sa naturang bakbakan.

Si Pacquiao ay kasama sa delegasyon ni Pangulong Rodrigo Duterte na bibisita sa Cambodia.

By  Ralph Obina   

Nahaharap sa panibagong reklamo si Floyd Mayweather Jr.

Ito ay kaugnay sa hindi niya pagsipot sa SLS Hotel sa Las Vegas.

Ayon sa pamunuan ng hotel, pumayag si Mayweather na doon niya gagawin ang kanyang kaarawan noong Pebrero at bilang bahagi ng kasunduan ay magbabayad ng hotel ng 35,000 dolyar bilang bahagi ng endorsement ng boksingero.

Naibigay na ng hotel ang kalahati ng naturang halaga subalit biglang nagkansela ang boksingero at nagpasya itong manatili sa europa para doon gawin ang kanyang kaarawan.

Nagpasya ang hotel na kasuhan si Mayweather matapos tumanggi ang kampo nito na isauli ang ibinigay na downpayment.

By  Katrina Valle