SPORTS

Hindi pa rin makakapag-coach para sa Golden State Warriors si Steve Kerr sa Game 1 ng NBA Finals kontra Cleveland Cavaliers.

Ayon kay Kerr hindi pa siya handa at ramdam pa rin ang kumplikasyon ng kanyang back surgery kabilang ang matinding sakit ng ulo, pagkahilo at pananakit ng leeg.

Gayunman, tiniyak ni Kerr na mag-coach man siya o hindi ay lilipad siya patungong Cleveland para suportahan ang kanilang koponan sa Game 3 at 4.

Dahil dito, si Assistant Coach Mike Brown muna ang titimon sa Warriors na nakapagtala ng sampung (10) sunud-sunod na panalo magmula nang mag-take over ito kay Kerr.

By Ralph Obina

Photo Credit: NBA.com

Arestado ng mga awtoridad sa Jupiter, Florida si golf legend Tiger Woods dahil sa pagmamaneho ng lasing.

Ayon kay Jupiter Police Spokesperson Kristin Rightler, si woods ay pansamantalang ikinulong subalit nakalaya rin mula sa Palm Beach County Jail matapos ang halos walong (8) oras.

Ang kuwarenta’y uno (41) anyos na golf legend ay inaresto alas-3:00 ng madaling araw.

By Judith Larino 

Handang ipansabong ni Top Rank CEO Bob Arum si 8th Division World Champion Manny Pacquiao kay UFC Champion Conor McGregor.

Ito aniya ay kung hindi pa rin tatanggapin ni Retired Undefeated Boxer Floyd Mayweather Jr ang hamong laban ni McGregor.

Sinabi ni Arum na bukas ang schedule ng Pambansang Kamao para sa naturang laban.

Ito ay kahit pa nalalapit na ang laban ni Pacquiao kontra sa Australian Boxer na si Jeff Horn.

Hanggang sa ngayon, inaantabayanan pa ng kampo ni McGregor kung pipirmahan o hindi ni Mayweather ang kontrata ng kanilang inaabangang bakbakan.

By Ralph Obina

Hindi umubra ang kuryente ng Meralco Bolts sa tindi ng tama ng Barangay Ginebra.

Ito ay matapos lumamang ng isang punto lamang ang Gin Kings sa makapigil hiningang paghaharap nila ng Bolts kagabi sa final score na 90-89.

Naging bayani sa panalo ng Gin Kings sina Justin Bronlee at LA Tenorio na kapwa gumawa ng tig-22 points.

Mula sa unang quarter ng taon hanggang matapos ang second quarter ay hawak ng Bolts ang kalamangan subalit nahabol ito ng Ginebra at nakalamang sila sa score na 88-86 sa huling 41 seconds ng fourth quarter.

Dahil sa nasabing panalo, nasa unang puwesto na ang Ginebra na may walong panalo at dalawang talo samantalang pitong (7) panalo at apat (4) na talo naman ang hawak ng Bolts.

By  Judith Larino   

Photo: PBA Images

Hindi pa isinasara ng veteran basketball player na si Willie Miller ang posibilidad ng kanyang pagbabalik Philippine Basketball Association (PBA).

Ayon kay Miller, kung mayroong mga team na nangangailangan ng kanyang tulong at pursigidong makasungkit ng kampyonato ay handa siyang maglaro muli.

Taong 2015 pa naglaro sa PBA ang 15-year veteran para sa Talk and Text Tropang Texters na nagkampyon naman sa Commissioner’s Cup 2015.

Dalawang beses din naging Most Valuable Player (MVP) at mayroong apat na championship si Miller sa PBA.

Matapos nito ay naglaro ang veteran guard sa ASEAN Basketball League para sa Pilipinas MX3 Kings.

By Drew Nacino

Bumubuti na ang kondisyon ni 8-Division World Champion Manny Pacquiao para sa laban nito kontra kay Jeff Horn na gaganapin sa Australia sa Hulyo.

Kahapon ay sumabak sa dalawang sparring session ang Pambansang Kamao.

Ayon kay Hall of Famer Coach Freddie Roach kung ikukumpara sa mga nakaraang pagsasanay ni Pacquiao ay mas umayos aniya ang timing gayon ng fighting senator.

Gayunman, hinahanap pa ni Roach ang mas maraming kombinasyon at distansya mula kay Pacquiao lalo’t agresibo aniyang kalaban si Horn.

By   Ralph Obina   

Taob sa Barangay Ginebra San Miguel ang Blackwater Elite sa kanilang pagtutuos kagabi sa nagpapatuloy na PBA Commissioners Cup.

Tinapos ng Gin Kings ang laban kagabi sa iskor na 96-82.

Nanguna sa panalo ng Barangay Ginebra si Justin Brownlee na tumipa ng tatlumpu’t limang (35) puntos na sinegundahan naman ni LA Tenorio na kumamada ng labing pitong (17) puntos.

By  Ralph Obina

Naungusan na ni Lebron James si Michael Jordan bilang All – Time Playoff Scoring Leader.

Kasunod ito ng three (3) pointer sa ikatlong quarter ng Game 5 ng Eastern Conference Finals, dahilan para magkaroon na siya ng 29 points para sa laro, at kabuuang 5, 989 points para sa kanyang post season career.

Ang naturang puntos ay bahagyang mas mataas lamang sa 5, 987 points ni Jordan.

Nakuha ni James ang unang puwesto sa Playoff Scoring List sa kanyang ika – 212 na laro, habang ang naunang record ni Jordan ay kanyang nagawa sa kanyang ika – 179 na laban.

By Katrina Valle

Pasok na sa ikatlong sunod na NBA Finals ang defending champion Cleveland Cavaliers.

Ito ay makaraang ilampaso ng Cavs ang kalabang Boston Celtics sa game 5 ng Eastern Conference Finals.

Pinatunayan ng Cavs na sila ang team to beat nang tapusin nito ang pag-asa ng Celtics sa iskor na 135-102.

Nanguna sa tagumpay ng Cavs si Lebron James na sumalaksak ng tatlumpu’t limang (35) puntos.

Dahil dito makakaharap din ng Cavs sa finals sa ikatlong pagkakataon ang Golden State Warriors.

By   Ralph Obina  

Tiwala si World’s Number 1 Andy Murray na makakabangon ang career sa paglahok sa French Open na magsisimula sa Lunes.

Magugunitang November 2016 nang tanghaling kauna-unahang British player na naging World’s Number 1 si Murray.

Si Murray din ang unang player sa Wimbledon Champion na nagkamit ng grandslam matapos ibulsa ang ATP World Tour Finals, men’s singles sa Olympic Games at Masters 1000 title sa loob lamang ng isang taon.

Tinapos ni Murray ang 2016 sa pamamagitan ng dalawampu’t apat (24) na sunud-sunod na panalo.

Gayunman, minalas si Murray sa pagsisimula ng taong 2017 matapos maagang ma-etsapuwersa sa Indian Wells, Monte Carlo, Barcelona at Madrid.

By  Judith Larino