RONDA PROBINSYA

Aprubado na ang pagiging ganap na Siyudad ng Calaca, Batangas na dating isang First class Municipality.

Sa ginanap na plebisito kahapon, tinanong ang mga botante kung pabor ang mga itong gawing Lungsod ng Batangas ang Munisipalidad ng Calaca, alinsunod sa Republic Act 11544.

29, 424 indibidwal ang bumotong yes sa desisyon habang 3,791 ang nagsabi ng no.

Ngayong isa nang Lungsod ang Calaca, mas maraming programa at proyekto ang maisasagawa.

Dahil sa plebisito, ang Calaca ay magiging panlimang Lungsod na sa Batangas sinundan ng Santo Tomas, na naging lungsod noong September 7, 2019.

Ang tatlong iba pang siyudad sa Batangas ay ang Tanauan, Lipa at ang kabiserang Batangas City.

Patay ang isang taong gulang na babae sa bayan ng Teresa, Rizal matapos mahulog sa traysikel at magulungan pa ng kasunod na jeep.

Batay sa imbestigasyon ng Teresa Police, hawak pa ng kapatid nito ang baby habang sakay ng traysikel na minamaneho ng padre de pamilya dakong alas-diyes y medya ng umaga.

Pero nang tinahak na ng mag-anak ang highway sa J. Sumulong Avenue, Barangay Bagumbayan ay biglang nahulog ang bata mula sa loob ng traysikel at nasagasaan pa ng kasunod na jeep.

Nagawa pang isugod sa pinakamalapit na pagamutan ang sanggol pero nasawi na ito sa kalsada pa lang.

Sa ngayon, iniimbestigahan ng mga pulis ang ama at jeepney drayber para alamin kung may kasalanan din ang mga ito sa nangyaring insidente.

Isinailalim na sa red alert ang lahat ng ahensiya sa Baguio City bilang paghahanda sa epekto ng Typhoon Henry.

Epektibo ang kautusan kahapon, September 2 at magtatagal hanggang sa Lunes, September 5.

Ang mga Sangay ng Pamahalaan sa Baguio City ang magsisilbing Quick-Response Team sa oras na kailangan nang magpatupad ng Pre-emptive evacuations.

Handa rin ang mga member agencies ng City Disaster Risk Reduction Management Council at LGUs na magmomonitor ng mga lugar na prone sa pagguho ng lupa at pagbaha.

Kinumpirma ni Philippine National Police chief Rodolfo Azurin Jr. na mga miyembro ng Bangsamoro Islamic Freedom Fighters (BIFF) ang mga suspek sa pananambang sa chief of police ng Ampatuan, Maguindanao.

Sinabi ni Azurin na ang mga BIFF ay  nasa ilalim ng grupo ni commander Boy Jacket at Abdulnasser Guianid.

Umaasa naman siyang makikipagtulungan ang MILF sa paghuli sa mga suspek at tutugon sa panawagan niyang isuko na ng mga ito ang miyembro nilang may warrant of arrest.

Nabatid na maghahain lang sana ng warrant of arrest ang hepe ng Ampatuan police na si police lieutenant Reynaldo Samson at mga kasamahan nito nang pagbabarilin ang police patrol na sinasakyan nila.

Maliban sa kanya, nasawi rin sa pananambang si police corporal Salipuden Endab habang nasugatan naman sina police corporal Rogelio Dela Cuesta Jr. at police corporal Marc Clint Dayaday.—mula sa ulat ni Gilbert Perdez (Patrol 13)

Isinailalim na sa state of calamity ang Iloilo City dahil sa outbreak ng Acute Gastroenteritis (AGE) at cholera.

Nagdeklara ng outbreak ang City Health Office (CHO) matapos pumalo sa 284 ang kaso ng age sa lungsod kung saan pito na ang namatay kahapon, September 1 habang walo naman ang kumpirmadong kaso ng cholera.

Ayon kay Dr. Annabelle Tang ng CHO, nagpositibo sa e-coli at coliform ang mga pinagkukunan ng suplay ng tubig ng mga residente na nagpositibo sa AGE.

Kaya naman patuloy ngayon ang pagsailalim sa testing ng deep wells gayundin ang mga refilling station sa lungsod.

Samantala, nasa P12.5 million pesos ang pondo sa Quick Response Fund (QRF) ng lungsod na gagamitin para sa mga gamot, medical supplies, at human resource.

Sugatan matapos tambangan ang isang abogado kasama ang kaniyang anak sa Mandaue City, Cebu.

Ayon sa mga otoridad, alas-10:00 kagabi nang pagbabarilin ng hindi pa nakikilalang suspek si Atty. Karen Quinanola-Gonzales at anak nito habang nasa loob ng sasakyan.

Agad na isinugod sa ospital ang mag-ina at patuloy na nagpapagaling.

Sa ngayon, patuloy pang iniimbestigahan ng Mandaue City Police ang motibo ng mga suspek sa naganap na pananambang. —sa panulat ni Hannah Oledan