RONDA PROBINSYA

Naitala ang ilang kaso ng landslide sa Baguio City nito lamang Sabado at Linggo dahil sa malakas na pag-ulan bunsod ng masamang panahon.

Inilikas naman ang apat na pamilya sa barangay Pacdal matapos ang malakas na pag-ulan na nakapagdulot ng landslide bandang alas-8 ng gabi noong Sabado.

Ayon sa City Disaster Risk Reduction Management Council (CDRRMC), nasa anim na insidente ng soil erosion ang naitala sa lungsod.

Nagsagawa naman ang konseho ng geo-tagging assessment para mapigilan ang anumang karagdagang insidente at inihahanda na rin ang mga kagamitan sa isasagawang clearing operations sa lugar.—sa panulat ni Hannah Oledan

Patay sa isang engkwentro ang asawa at anak ng isang dating lider ng New People’s Army (NPA) na si Jorge Madlos o mas kilala bilang “Ka Oris” noong Sabado sa Impasug-ong, Bukidnon.

Ayon sa 403rd Infantry Brigade ng Philippine Army, nagkaroon ng bakbakan sa pagitan ng NPA at tropa ng 8th Infantry Battalion na nagresulta sa pagkamatay ng mag-inang Vincent Isagani Madlos at Angie Polandres Salinas.

Nakubra din ng mga sundalo mula sa mga rebelde ang dalawang AK47 rifle, hand grenade, mga subersibong dokumento, at mga personal na gamit.

Matatandaang napaslang din sa isang operasyon sa Impasug-ong, Bukidnon noong Oktubre nang nakaraang taon si Ka Oris na dati ring tagapagsalita ng NPA.—sa panulat ni Hannah Oledan

Nagpaliwanag naman ang Occidental Mindoro Consolidated Power Corporation (OMCPC) bilang tugon sa panawagan ni Governor Eduardo Gadiano na aksyunan ang perwisyong dulot ng kakulangan ng supply ng kuryente.

Ayon kay OMCPC president Calvin Genotiva, hindi sila makapag-o-operate nang maayos kung hindi sila babayaran ng Occidental Mindoro Electric Cooperative (OMECO).

Aabot anya sa P258 million ang dapat nilang kolektahin mula sa OMECO na bahagi ng ipinataw na penalty ng Energy Regulatory Commission sa OMECO kaugnay ng pagka-antala ng Competitive Selection Process (CSP).

Ang CSP ay subsidiyang binabayaran ng National Power Corporation at bahagi ng buong universal charge on missionary electrification, pero pinasagot ng ERC sa OMECO ang 50% ng bayarin.

Sa pinakahuling power update ng OMECO, kulang na kulang umano sila sa supply ng krudo at nakikipag-tulungan na sa OMCPC para mapabilis ang proseso ng pagbiyahe ng fuel supply.

Dumating na sa Mindoro ang tatlong fuel truck ng OMCPC mula sa Batangas Port.

Magugunitang nawalan muli ng kuryente ang ilang bahagi ng mga Bayan ng San Jose, Magsaysay, Rizal at Calintaan noong Huwebes pero naibalik din matapos magpaandar ng 20 megawatt unit ang OMCPC.

Gayunman, pansamantala lamang ito dahil 20,000 liters lamang ng krudo ang nabili ng OMCPC kaya’t nitong sabado ay muling nag-shutdown ang planta sa Pulang Lupa, Central maging sa Tayamaan, Mamburao.

Dumami umano ang kaso ng rape na kinasasangkutan ng mga menor de edad sa Davao City, ngayong taon.

Sa datos ng Davao City Police Office, mahigit kalahati sa isandaang naisampang kasong Rape simula Enero hanggang Agosto ay pawang menor de edad ang biktima.

68 sa mga kaso ay may mga biktimang edad 12 hanggang 17 habang nasa 91 babae at 9 na lalaki ang mga complainant.

40 suspek naman ang naaresto at 60 pa ang pinaghahanap.

Nagsasagawa na ng lecture ang pulisya para sa mga mag-aaral hanggang High School hinggil sa “safe and unsafe touch” upang bigyang babala ang mga bata sa mga posibleng krimen, gaya ng panggagahasa at anumang pang-aabuso.

Pumirma na rin ng kasunduan ang city Government at Department of Education upang mapabilang ang Gender-related crimes, tulad ng Sexual abuse sa ituturo sa mga estudyante para madagdagan ang kaalaman ng mga bata hinggil dito.

Nanawagan ang ilang mga eksperto mula sa limang bansa sa Asya na iprayoridad muna sa ngayon ang posibleng kakulangan sa suplay ng isda.

Ayon sa mga eksperto, dapat na isantabi muna ng mga gobyerno ang girian sa South China sea at tutukan ang posibleng pagkaubos ng isda sa mga susunod na taon.

Nabatid na kabilang sa mga umaangkin sa teritoryo sa South China Sea ang Pilipinas, Vietnam, China, Indonesia, at Malaysia.

Batay sa mahigit limang taong pag-aaral ng mga eksperto lumalabas na kung hindi maaagapan ang girian ng mga bansa, kabilang sa mga nanganganib na maubos ang isdang tambakol o yellow fin tuna at skipjack tuna na isa sa karaniwang hinuhuli ng mga mangingisda sa nabanggit na mga bansa.

Samantala, sinabi ng mga eksperto na sa nakalipas na pitong dekada, bumaba ng 70% hanggang 95% ang dami ng isda sa South China Sea kung saan, isa sa nagiging problema ang mainit na temperatura sa dagat dahil sa climate change.

Dalawang adult Philippine Tarsier ang nasagip ng mga otoridad sa Sitio Kamboling, Barangay Calabanit, sa Munisipalidad ng Glan, Sarangani Province.

Ayon sa mga tauhan ng Community Environment and Natural Resources Office (CENRO) nakatanggap sila ng impormasyon mula sa isang Municipal Councilor hinggil sa dalawang tarsier na iligal na inaalagaan sa isang farm.

Agad itong pinuntahan ng mga otoridad upang suriin ang kalusugan at lagay ng dalawang Tarsier kung saan, nakitang aktibo, walang sugat, at malusog ang mga ito base narin sa pagsusuri na ginawa ng Municipal Veterinarian.

Nabatid na itinuturing na near threatened species ang mga Philippine Tarsier sa ilalim ng International Union of Conservation of Nature (IUCN) dahil sa bumababang populasyon ng mga ito.

Sa ilalim ng Republic Act 9147 o Wildlife Resources Conservation and Protection Act, pinoprotektahan at ipinagbabawal ang pangangaso, pagpatay, at pag-aalaga ng mga Philippine Tarsier.

Dahil dito, inihatid o itinurn-over na ng mga lokal na opisyal ang dalawang tarsier sa Community Environment and Natural Resources Office (CENRO) at pareho din itong pinakawalan sa isang ligtas na lugar.

Bukod pa dito, nagsagawa narin ang CENRO ng Information Education, and Communication (IEC) campaign sa mga komunidad para maturuan ang mga residente sa kahalagahan ng mga wildlife species sa bansa.