RONDA PROBINSYA

 Nabalot ng takot ang mga residente matapos madiskubre ang isang bag na naglalaman ng mga sangkap sa paggawa ng bomba sa isang lumang paaralan sa Sitio Pandakan, Barangay Parangbasak, Lamitan City, Basilan.

Pahayag ni Joint Task Force-Basilan commander Brig. Gen. Domingo Gobway, nagsasagawa ng strike operation ang mga tropa laban sa Saddam Siddick Group nang makita ang mga gamit pampasabog.

Mabilis namang rumesponde ang mga elemento ng 39th Explosive Ordinance Disposal kung saan narekober ang mga IED component.

Nakiisa ang libo libong deboto sa isinagawang prusisyon ng Nuestra Senyora De Peñafrancia sa Naga City, Camarines Sur.

Ito ang tanda bilang simula ng siyam na araw na novena bago ang kapistahan sa 28 ng Setyembre.

Matapos ang prusisyon, isinagawa naman ang Pontifical Mass para sa 140th anniversary ng imahe ng El Divino Rostro.

Magugunitang, dalawang taon na hininto ang naturang aktibidad dahil sa COVID-19 Pandemic.

Nakararanas pa rin ng oversupplyng bawang ang Batanes.

Ito’y matapos bawasan ng Department of Agriculture (DA) sa Region 2 ang binibiling bawang mula sa mga magsasaka.

Ayon kay Batanes Governor Marilou Cayco, kung dati ay malaking bahagi ng bawang ang binibili ng DA para ipamahagi sa mga magsasaka sa bansa bilang binhi, ay nagbago na ito ngayon.

Hindi naman sapat ang naunang binili ng Provincial Government ng 13.5 metric tons dahil mayroon pa ring 20 toneladang natitirang suplay.

Sa ngayon, nagpasaklolo na ang Batanes LGU sa mga maliliit na negosyo sa lalawigan dahil nasa full capacity na ang storage facility ng provincial agricultural office.

Patay ang siyam katao dahil sa gastroenteritis sa Iloilo City.

Ayon kay Iloilo City Mayor Jerry Trenias, nasa halos 400 katao na ang dumaranas ng gastroenteritis matapos uminom ng hindi malinis na tubig.

Marami pa aniya ang naka confine at malaking porsyento ng mga ito ay mga baby at senior citizens.

Ipinabatid ni Trenias na 29 na water refilling stations ang naipasara matapos ang mga nasabing insidente

Nasa 3,000 hanggang 10,000 balon ang na inspeksyon na rin ng mga otoridad.

Tiniyak ni Trenias na tinututukan na nila ang usapin lalo’t nag face to face classes na sa mga paaralan.

Bumaba ang naitalang bagong kaso ng COVID-19 sa Central Visayas.

Ayon sa DOH, mula August 28 hanggang September 3, nasa 488 new cases ang naitala sa Central Visayas kung saan nasa 70 ang average daily rate.

Mula sa halos 500 bagong kaso ng COVID 19 sa nasabing rehiyon, apat ang nasa kritikal na kondisyon.

Hindi na interesado ang Mandaue City sa Cebu na bitiwan na ang face mask rule.

Ayon ito kay Mandaue City Mayor Jonas Cortes matapos batikusin ng National Officials ang pasya ng Cebu City Government hinggil sa Non-obligatory wearing ng face mask.

August 31 nang magpalabas ng pahayag si Cortes na bukas siyang sundan ang naturang desisyon ng Cebu City Government.

Subalit sinabi ni Cortes na nagbago ang kanyang isip dahil ayaw niyang isugal ang kalusugan ng kanyang mga kababayan kayat dapat mahigpit na sundin ang ordinansa sa pagsusuot ng face mask.

Bukas naman aniya siya sakaling i-lift ng Konseho ang kautusan hinggil sa pagsusuot ng face mask ng mga residente ng Mandaue City.

Pumalo na sa halos 40 baboy ang kinatay sa bayan ng Santa Magdalena, Sorsogon dahil sa paglaganap ng African Swine Fever (ASF).

Ayon kay Elvie Frayna, Municipal Agriculture Officer ng lalawigan, 39 na ulo ng baboy ang kinatay at inilibing sa isang bakanteng lote sa lugar noong Biyernes.

Dagdag pa niya, isang buwan nilang idi-disinfect ang babuyan sa lugar.

Ipinagbabawal na rin muna ang pagpapapasok ng mga baboy o karne sa kanilang lugar.—sa panulat ni Hannah Oledan

Isang sakong palutang-lutang sa dagat ang narekober ng ilang mangingisda sa Puerto Galera, Oriental Mindoro.

Nang sipatin ang nilalaman ng sako, tumambad sa mga mangingisda ang bangkay ng isang lalaki.

Ayon sa Pulisya, walang pang-itaas na damit at nakasuot ng kulay brown na shorts ang hindi pa nakikilalang biktima nang matagpuan sa Barangay Balatero.

Wala ring tape at nakitang sugat sa katawan ng biktima, na pinaniniwalang pagkalunod ang ikinamatay pero palaisipan kung bakit ito nakasilid sa sako.

Pinaniniwalaan ding apat hanggang pitong na araw nang palutang-lutang sa dagat ang biktima.

Nagsasagawa na ng imbestigasyon ang mga otoridad upang matukoy ang pagkakakilanlan ng biktima.

Muling nag-alboroto ang Bulkang Kanlaon sa Negros Island matapos makapagtala ng 11 volcanic earthquakes.

Sa kabila nito, inihayag ng PHIVOLCS na nananatili sa Alert level 1 ang kanlaon habang namataan ang pagbuga ng usok sa bunganga ng bulkan na may taas na 200 meters.

Mahigpit namang ipinagbabawal ang pagpasok sa 4-kilometer radius permanent danger zone sa paligid ng Kanlaon.

Ipinagbabawal din ang pagpapalipad ng anumang uri ng eroplano malapit sa bulkan dahil sa banta ng pagsabog.

Nasa P1.8 billion na halaga ng iba’t ibang klase ng kalakal, kabilang ang lokal at imported na mga asukal, ang nadiskubre ng bureau of customs sa sorpresang inspeksyon sa isang bodega sa Nasugbu, Batangas.

Inilunsad ng BOC ang inspeksyon sa bodega ng Central Asucarera Don Pedro sa Barangay Lumbangan.

Nadiskubre ng ADUWANA ang tinatayang 181,000 sacks ng imported na brand ng pure refined sugar mula Thailand at 197,590 sacks ng lokal na Don Pedro White Sugar na tumitimbang ng 50 kilo bawat isa.

Pansamantala namang ikinandado ang nasabing bodega upang siguraduhin na walang makakapasok at makakalabas dito.

Ito na sa ngayon ang isa sa pinaka-malaking operasyon na isinagawa ng customs simula nang ilarga nila ang pag-i-inspeksyon sa mga imbakan ng asukal noong Agosto.