RONDA PROBINSYA

Pumayag na umanong makipag-areglo ang pamilya ng nasawing security guard matapos mabundol ng SUV habang nagmamando ng daloy ng trapiko sa Dasmariñas City, Cavite.

Kinumpirma ni Dasmariñas City police chief, Lt. Col. Juan Oruga na pinakawalan na nila ang Mitsubishi Montero driver na si Primo Mallari Salarda.

Ito, ayon kay Oruga, ay matapos magkaroon ng “amicable settlement” sa pagitan nina Salarda at pamilya ng biktimang si Rodolfo Mejos, 52-anyos.

Agosto 22 nang maganap ang aksidente sa tapat ng Orchard golf and country club sa barangay Abad Santos Avenue, barangay Salawag kung saan naka-assign si Mejos.

Mabilis ang takbo ni Salarda kaya’t tumilapon ang security guard at hindi na umabot nang buhay sa ospital.

Bagaman sinampahan ng reklamong paglabag sa anti-drunk driving law si Salarda, iniurong na ito dahil sa kasunduang pinasok ng pamilya ng biktima sa driver.

Wala pang pasya ang Talisay City Police sa Cebu kung kakasuhan o hindi ang babaeng nag-post sa social media ng isang fake kidnapping incident sa barangay Cansojong na naganap noong August 25.

Inihayag ni lt. Col. Randy Caballes, hepe ng Talisay City Police Station na kung mayroong sapat na basehan na laban kay Graciella Maurice Aliño, ay magsasampa sila ng kaso bukas.

Agosto 26 nang mag-viral sa social media ang post ni Aliño hinggil sa dinukot umanong babae sa Uldog street.

Lulan si Aliño ng motorsiklo nang madaanan ang isang babaeng sumisigaw pero sa halip na beripikahin ay ipinost agad ito sa social media na kanya namang tinawag na insidente ng kidnapping.

Naalarma naman si mayor Gerald Anthony “Samsam” Gullas sa nabanggit na online post at ipinag-utos ang pagsasagawa ng imbestigasyon habang nag-public apology na kalauna’n si Aliño.

Samantala, hinimok ni Caballes ang mga residente na huwag basta mag-post ng mga unverified incident at tsismis sa social media dahil may kaakibat itong parusa o kaso.

Nag-alok na ng P100,000 pabuya si Cavite 4^th District Rep. Elpidio “Pidi” Barzaga para sa sinumang makapagtuturo sa kinaroroonan ng motorcycle-riding gunman na bumaril at pumatay sa isang traffic enforcer sa Dasmariñas City noong Sabado.

Inihayag ni Barzaga, chairman ng House Committee on Natural Resources, na ang pabuya ay makatutulong upang mapabilis ang pagresolba sa kaso.

Dismayado at kinondena rin ng Kongresista ang nasabing insidente.

Batay sa CCTV footage, nakikipag-usap si Edgard Quiroga sa isang motorista nang biglang sumulpot ang hindi pa nakikilalang rider at pinaputukan ang biktima.

Nakasuot ang suspek ng pula at itim na helmet, kulay gray na pang-itaas na may mahabang manggas at maong na pantalon at nakasakay sa kulay pula at itim na Yamaha MIO na walang plaka.

Patay ang apat na katao matapos malunod sa Kabilang-bilangan Reef sa Barangay Sicaba, Cadiz, Negros Occidental.

Naging mapait na karanasan ang dapat sanang masayang outing ng magkakapamilya at magkakaibigan matapos malunod sa dagat ang mga biktima.

Unang nahulog sa dagat ang 15 taong gulang na bata dahil sa lakas ng alon.

Sunod namang nalunod ang isa pang biktima na kinilalang si Marlyn Guirre, 33 taong gulang nang tangkain nitong sagipin ang anak.

Ito naman ang nag udyok kay Remymar Ocon, 31 taong gulang at ng 13 taong gulang na bata upang sagipin sina Aguirre at ang anak nito ngunit nauwi rin sa pagkakalunod ng biktima.

Ipinabatid naman ni Chief petty officer Joel Taganile, Head ng Philippine Coast Guard – Cadiz Substation na hindi overloaded ang pumpboat na sinakyan ng mga biktima, kundi ang pagbabago ng daloy ng alon mula high tide at papunta sa low tide na maaaring nakagawa ng malalaking alon.

Dagdag ni Taganile, ipinagbabawal na ang paggamit ng pumpboats sa pagtawid sa dagat dahil sa malalaking alon ngunit mayroon pa ring iilan ang hindi sumusunod sa utos na ipinatupad ng PCG.

Samantala, nakipag-ugnayan na sina Taganile sa mga opisyal para ipaalala sa publiko na iwasan ang paggamit ng maliliit na bangka bilang mode of transportation. —sa panulat ni Hannah Oledan