RONDA PROBINSYA

Dalawang oras na hindi nakalabas o na-trapped sa loob ng elevator sa isang hotel sa  Barangay Pajo, Lapu-Lapu City sa  Cebu ang pitong indibidwal matapos magka-aberya ang sinasakyan nitong elevator.

Ayon kay Bureau of Fire Protection Responder FO3 Alvin Villabin sa kanilang paunang imbestigasyon ala-7 pa ng gabi nang matrap ang mga indibidwal at alas-9 na ng gabi nakalabas ang mga ito at wala namang nasaktan.

Upang mabuksan ng elevator gumamit ng hydraulics at pwersahang binuksan dahil ang mismong maintenance ng elevator ay hindi rin ito mabuksan.

Habang iniimbestigahan pa ng mga otoridad ang tunay na sanhi ng insidente.

Hinostage noong Sabado ang pamilya ni Mayor Galic Truita ng Dauin, Negros Occidental.

Ayon kay Provincial Police Office Pol. Col. Jonathan Pineda, kinilala ang nang-hostage na si Venirando Dalope, driver ng Alkalde.

Ikinulong ni Dalope ang asawa ni Mayor Galic at tatlo pang miyembro ng pamilya nito dakong alas-9 ng umaga, sa kanilang bahay sa Barangay Masaplod, Dauin.

Tumagal ng walong oras ang negosasyon bago naaresto ang suspek na may bitbit na caliber .45 na baril.

Sa ngayon, bagaman hindi inilabas ng mga otoridad ang dahilan ng suspek, agad namang isinailalim sa psychological test ang mga hinostage nito.

Nilinaw ng Philippine Coast Guard (PCG) na walang nawawalang pasahero sa nasunog na roll-on/roll-off ship na MV Asia Philippines.

Ayon sa PCG, natagpuan na ang 47 pasahero at 38 crewmen ng naturang passenger vessel.

Pahayag ng ahensya, ang dalawang pasahero na naunang idineklarang missing ay sumakay ng 3pm vessel trip at hindi ang 5pm na byahe ng barko.

Samantala, isang 43-year-old na ginang ang isinugod sa ospital dahil sa tinamong pinsala sa katawan matapos ang nangyaring sunog.

Walang namang ibang barko na nadamay sa nangyaring fire incident na umabot ng tatlong oras bago tuluyang naapula.

Sugatan ang isang pasahero ng MV Asia Philippines matapos magliyab ang barko sa bisinidad ng Batangas Port kahapon.

Ayon sa Philippine Coast Guard (PCG), isinugod na sa pinakamalapit na ospital ang nasugatan.

Nagpapatuloy naman ang Search and Rescue operation sa lahat ng sakay ng barko.

Sa datos ng PCG, 48 pasahero at 34 na crew ang sakay ng barko nang ito ay mag-apoy.

Maliban pa ito sa 16 na rolling cargoes, pitong private vehicles, dalawang motor at pitong truck.

Patuloy namang iniimbestigahan ng PCG ang sanhi ng pagliyab ng barko.

Aabot sa mahigit 100 preso sa Iloilo District Jail sa Pototan, Iloilo ang umakyat sa bubong ng bilangguan kahapon.

Ito ay upang iprotesta ang dinaranas na gutom sapat at ipanawagan ang pagsibak sa kanilang jail warden na si Jail Chief Inspector Norberto Miciano Junior.

Nag-ugat ang protesta sa pag-ipit ni Miciano sa rasyong pagkain sa preso na isang beses na lang kada araw mula sa dating tatlong beses kada araw.

Iniimbestigahan na ng Bureau of Jail Management and Penology – Region 6 ang reklamo ng mga preso.

Apat katao ang isinugod sa Cagayan Valley Medical Center (CVMC) sa Tuguegarao City matapos magtamo ng mga sugat dulot ng Bagyong Florita.

Kabilang sa nasugatan ang isang 28-anyos na residente na nagtangkang iligtas ang kanyang kalabaw pero nahulog kaya’t kailangang isailalim sa operasyon.

Ayon kay Dr. Glenn Matthew Baggao, Medical Director ng nasabing pagamutan, isang sampung taong gulang naman ang nabagsakan ng puno dahil sa lakas ng hanging dala ng bagyo.

Samantala, inilikas anya ang mga pasyente sa unang palapag ng CVMC makaraang bumaha pero wala namang nasaktan sa staff ng ospital.